Një i arrestuar, tre në kërkim dhe një kryeplak i proceduar penalisht, është bilanci i aksionit të policisë në Dibër ku janë goditur dy raste të kultivimit të kanabisit.
Më konkretisht në Njësinë Administrative Derjan, në një terren të pyllzuar, shërbimet e Komisariatit të Policisë Mat, kanë evidentuar dhe goditur një rast të tentativës për kultivim të bimëve narkotike. Si rezultat është arrestuar në flagrancë shtetasi H. B.,27 vjeç, banues në Krujë, si dhe është shpallur në kërkim dhe po punohet për kapjen e shtetasit B. P.
Sakaq në Njësinë Administrative Muhurr, në pronën e shtetasve T. S., dhe A. S., policia ka konstatuar dhe goditur një rast të tentativës për kultivimin e bimëve narkotike.
Në përfundim të veprimeve të para hetimore u shpallën në kërkim policor shtetasit T. S., 34 vjeç, dhe A. S., 28 vjeç, (vëllezër), banues në fshatin Rreth Kale, si dhe u procedua penalisht në gjendje të lirë shtetasi SH. L, kryeplak i fshatit për veprën penale “Shpërdorim i detyrës”./ Opinion.al
