Mesa duket Tërmeti Preçi sa herë që del publikisht, e ka për “zakon” të bëhet lajm. Mesa duket lavdet dhe “piedestalet” që i thuri Ramës, ja kanë marrë mendjen, dhe ka bërë një gafë.
Peçi gjatë fjalimit tha se ‘plot 8.1 milionë euro i ka promovuar qeveria Bashkisë Tepelenë’. Me siguri që Peçi e ka dashur të thotë ‘akorduar’, por është ngatërruar ose kuptimin e fjalës ‘promovuar’ e di ndryshe.
Kujtojmë që në vitin 2015, Peçi ishte shprehur gjatë një takimi elektoral se ‘Partia Socialiste do të sigurojë një fitore publiçitare’.
Peçi gjithashtu kërkoi nga Rama edhe një stadium Kombëtar, duke e quajtur komandant.
“Faktikisht, këto duartrokitje nuk janë për mua, janë për komandantin. Siç bëri këtë mrekulli kryeministri, të na bëjë edhe një stadium për gjithë Qarkun e Gjirokastrës. Emrin e vëmë si të duash, po deshe “Arena Ali Pasha”, si të jetë… Më lejoni që ta bëj edhe ta ngrejë pak tonin, falë edhe një herë… se nuk dua të them 100 herë falë e falë, por të na rrojë sa malet…. zhvillimin e parkut eolik në Maikosh, energji të rinovueshme përmes erës, 15 milionë euro investohen në Tepelenë në zonën e Maikoshit, me 70 vende pune. Ky burri këtu i bën! Po ka burrë nëne që ka vënë dorë dhe vë dorë këtu, je vetëm ti”, tha Peçi në fjalën e tij.
Lavdet funksionuan për kryebashkiakun e Tepelenës, të cilin komandanti duket se e rikonfirmoi si kandidaturë për vitin 2019: “Do të vazhdojmë projektet me Tërmetin dhe është një shembull, jo për ato që thotë për mua se i them 100 herë mos i tepro këto, por Tërmeti është i vendosur, nuk kam çfarë i bëj dhe në fund i del llogaria, i merr votat për ato fjalë që thotë për mua”.
Rama nuk iu përgjigj kërkesës për stadium, por premtoi se në qershor do të nisë puna për ujësjellësin e Tepelenës.
