Ngritja e Gjykatës Kushtetuese mbetet një nga çështjet kryesore të Shqipërisë për t’u zgjidhur. Presidenti Meta dhe kryeparlamentari Ruçi kanë bërë thirrje që procesi mos të zvarritet më pasi pengon rrugën e Shqipërisë drejt integrimit europian.
Por më shumë “llogari” për Gjykatën Kushtetuese kërkojnë ndërkombëtarët. Ambasadorja amerikane, Yuri Kim, dhe ai i Bashkimit Europian, Luigi Soreca takuan këtë të mërkurë kryetaren e Këshillit të Emërimeve në Drejtësi, Vitore Tusha.
Këshilli i Emërimeve në Drejtësi do të mblidhet ditën e nesërme për të nisur procesin e plotësimit të vendeve vakante në Gjykatë. Kryetarja e KED, njëkohësisht edhe anëtare e Gjykatës Kushtetuese, Vitore Tusha u konfirmoi dy diplomatëve kalendarin e plotësimit të vendeve vakante në Gjykatën Kushtetuese.
“Kur kjo të ndodhë, atëherë Meta, Ruçi dhe Tusha do të kenë merita për ndërmarrjen e veprimeve në përputhje me opinionin e Komisionit të Venecias, si përgjigje për kërkesën e popullit shqiptar për Reformë në Drejtësi”, shkroi Kim në Tëitter pas takimit.
Kim dhe Soreca u shprehën optimistë që Shqipëria do të ketë një Gjykatë Kushtetuese funksionale brenda fundit të vitit dhe theksuan gjithashtu se ajo është kusht kyç për të nisur bisedimet e anëtarësimin në konferencën e parë ndërqeveritare.
“Sigurimi i funksionimit të plotë të Gjykatës Kushtetuese është një kusht kyç për të nisur bisedimet e anëtarësimin në konferencën e parë ndërqeveritare. Bashkimi Europian vijon të mbështesë Shqipërinë për Reformën në Drejtësi dhe i qëndron pranë, si një vend anëtar i ardhshëm i Bashkimit Europian”, tha Soreca.
Gjykata Kushtetuese e Shqipërisë ka 9 anëtarë dhe që të funksionojë asaj i duhen minimalisht 5 anëtarë. Tre anëtarë emërohen nga Presidenti i Republikës, tre anëtarë zgjidhen nga Kuvendi dhe tre anëtarë zgjidhen nga Gjykata e Lartë. Gjyqtarët e Gjykatës Kushtetuese qëndrojnë në detyrë për 9 vjet, pa të drejtë riemërimi.
Këshilli i Emërimeve në Drejtësi bën vlerësimin e kandidaturave për anëtar të Gjykatës Kushtetuese në bazë të dokumentave dhe intervistave. Pas vlerësimit të kandidaturave KED i paraqet presidentit, kuvendit ose Gjykatës së Lartë, listën e renditur sipas pikëve dhe ata do të zgjedhë një prej tre të parëve.
Gjykata Kushtetuese ka aktualisht 4 anëtarë, Vitore Tushën, Elsa Toskën, Marsida Xhaferllarin dhe Fiona Papajorgjin.
Tre të fundit u emëruan vjeshtën e vitit të shkuar pas një përplasjeje të ashpër mes Presidentit Meta, Kuvendit dhe KED rreth kompetencave për emërimin e anëtarëve.
Si përfundim Kuvendi emëroi Elsa Toskën dhe Fiona Papajorgjin ndërsa presidenti Meta, Marsida Xhaferllarin dhe Besik Muçin por ky i fundit u shkarkua më vonë pasi nuk u konfirmua në detyrë nga procesi i vetingut./ Opinion.al
