Rajoni

Gjykata Kushtetuese: Kërkesa e Haradinajt e papranueshme


               Publikuar në : 18:28 - 04/09/19 |
el ida

Gjykata Kushtetuese e Kosovës e ka cilësuar si të papranueshme kërkesën e kryeministrit në largim, Ramush Haradinaj për interpretimin e dorëheqjes së kryeministrit dhe qartësimin e kompetencave dhe funksionimit të qeverisë, pas dorëheqjes së kryeministrit.

Gjykata Kushtetuese tha se çështjet e ngritura nuk hyjnë në fushëveprimin e juridiksionit të Gjykatës Kushtetuese ndaj vendosi ta deklarojë kërkesën të papranueshme.

Kërkesa e Haradinaj është shtruar në fund të muajit korrik pas reagimeve të partive politike dhe organizatave të shoqërisë civile për përgjegjësitë e kryeministrit të dorëhequr, që ishte edhe rasti i parë që nga shpallja e pavarësisë së Kosovës.

Asokohe Haradinaj tha se kushtetuta e Kosovës nuk e ka të përcaktuar se çfarë ndodh kur një kryeministër jep dorëheqjen.

Ai paraqiti dorëheqjen e parevokueshme më 19 korrik pasi u thirr për t’u marrë në pyetje nga prokuroria e posaçme në Hagë në cilësinë e të dyshuarit krime të luftës dhe të pasluftës në Kosovë.

Si pasojë e vendimit të Haradinajt për dorëheqje, Kuvendi i Kosovës është shpërndarë dhe presidenti i Kosovës, Hashim Thaçi ka shpallur 6 tetorin si datë për mbajtjen e zgjedhjeve parlamentare në Kosovë./Opinion.al

 

Pas