Gjykata e Lartë e Mianmart ka refuzuar apelin e dy gazetarëve të agjencisë Reuters, të burgosur lidhur me raportimet e tyre për komunitetin mysliman, Rohingya.
Wa Lone dhe Kyaw Soe Oo u dënuan me shtatë vjet burgim shtatorin e kaluar, pasi zbuluan se forcat e sigurisë së shtetit ekzekutuan dhjetë myslimanë Rohingya në vitin 2017, kohë kur gazetarët po mbulonin fushatën ushtarake në shtetin Rakhine që dëboi rreth 700 mijë myslimanë Rohingya përtej kufijve në Bangladesh.
Dy gazetarët janë në burg prej më shumë se një viti, me akuzën e thyerjes së Aktit të Sekreteve Zyrtare të Mianmarit.
“Ata u dënuan me shtatë vjet dhe ky vendim mbetet në fuqi”, tha gjykatësi i Gjykatës së Lartë, Soe Naing, pa dhënë detaje të tjera.
Në muajin janar, gazetarëve iu refuzua apeli edhe nga një gjykatë më e ulët, ndërsa SHBA dhe disa fuqi perëndimore kanë bërë thirrje për lirimin e tyre, por qeveria e Mianmarit, iu është kundëpërgjigjur duke ndaluar gazetarët dhe vëzhguesit ndërkombëtarë që të udhëtojnë në zonë në mënyrë të pavarur.
Arrestimi i Wa Lone dhe Kyaw Soe Oo, shkaktoi zemërim ndërkombëtar midis aktivistëve të lirisë së shprehjes dhe të të drejtave të njeriut, të cilët e panë rastin si sprovën e parë reale për lirinë e shprehjes në Mianmar, pas përqafimit të demokracisë në vitin 2016, pas dekadash nën sundimin ushtarak represiv./Opinion.al
