“Plani i Britanisë për të dëbuar azilkërkuesit në Ruandë është i paligjshëm”. Kështu vendosi të enjten Gjykata e Apelit e Londrës, si një pengesë e madhe për kryeministrin Rishi Sunak, i cili është zotuar të ndalojë emigrantët që mbërrijnë përmes Kanalit me varka të vogla.
Sipas një marrëveshjeje të arritur vitin e kaluar, qeveria britanike planifikoi të dërgonte dhjetëra mijëra azilkërkues që mbërrinin në brigjet e saj më shumë se 4,000 milje (6,400 km) në vendin e Afrikës Lindore.
Fluturimi i parë i planifikuar për të dërguar emigrantë në Ruanda u bllokua një vit më parë në një vendim të minutës së fundit nga Gjykata Evropiane e të Drejtave të Njeriut (GJEDNJ), e cila vendosi një urdhër që parandalon çdo dëbim deri në përfundimin e veprimeve ligjore në Britani.
Në dhjetor, Gjykata e Lartë vendosi se politika ishte e ligjshme, por ai vendim u kundërshtua nga azilkërkues nga disa vende së bashku me organizatat e të drejtave të njeriut.
Ndërsa me vendimin e së enjtes, tre gjyqtarë të lartë të apelit vendosën, me shumicë, se Ruanda nuk mund të trajtohej si një vend i tretë i sigurt.
“Mangësitë në sistemin e azilit në Ruandë janë të tilla që ka arsye të konsiderueshme për të besuar se ekziston një rrezik real që personat e dërguar në Ruandë të kthehen në vendet e tyre të origjinës ku ata përballen me persekutim ose trajtim tjetër çnjerëzor,” tha gjykatësi Ian Burnett.
Vendimi është një goditje e madhe për Sunak, i cili po përballet me nivele të larta inflacioni, rënie të mbështetjes publike dhe është nën presion në rritje nga partia e tij dhe publiku për t’u marrë me ardhjet e emigrantëve me varka të vogla.
Çështja e “ndalimit të gomoneve” është një nga pesë prioritetet e Sunak, i cili shpreson se rënia e numrit të emigrantëve mund të ndihmojë Partinë e tij Konservatore të arrijë një fitore të papritur në zgjedhjet e ardhshme kombëtare./Opinion.al
