Analisti Agron Gjekmarkaj nëpërmjet një shkrimi në Gazetën Panorama ka theksuar se si pasojë e lidhjeve të Policisë së Shtetit me krimin ka lulëzuar hashashi nga Veriu në Jug, pa dallim krahinor.
“Me t’u kthyer në shtëpi heronjtë e lodhur nga “lufta” e Lazaratit, aty-këtu hashashi gjet “dinjitetin” e tij, sa në Labëri, aq në Gegni! Në sytë e dynjasë ia kemi dalë të jemi unikë me Kushtetutën e vitit 1976, ku shpalleshim si i vetmi vend ateist në botë! Përsëri mund ta fitojmë këtë primat me sipërfaqen e mbjellë me hashash në raport me territorin e paktë të këtij vendi gërryer shekujsh! Asokohe mburreshim me kromin, tani nën zë me tubat e narkotrafikut”, shkruan Gjekmarkaj.
Analisti thekson se dy janë mundësitë: ose çdo gjë bëhet nën kujdesin e segmenteve të caktuara të këtij shteti që për shef ekzekutiv ka Edi Ramën, ose Rama me të vetët kontrollon veç sheshibn “Skënderbej” me grupin simbolik “Shqiponja”.
“Frika që sëmbon të madh e të vogël është se pranë së vërtetës rri hipoteza e parë! Në media është folur për një raport të Shërbimit Informativ Kombëtar, që akuzon për kujdestari shpirtërore ndaj hashashit drejtues të Policisë dhe administratorë lokalë!”, shkruan ai.
Ndërkaq, ai ka nenvizuar se opozita ka shprehur shqetësimin se me paratë e fituara prej tij mund të blihen zgjedhjet e vitit 2017. Sipas tij, ky është vërtet një shqetësim dhe problem i madh, por jo më i madhi.
“Fatkeqësisht, në vazhdën e denoncimeve dhe akuzave të përditshme, nuk përbën lajm rrëfimi tronditës i opozitës për këtë dukuri e as vetëmbrojtja dhe mohimi i këtij fenomeni prej shefit të ekzekutivit! Rutina shqiptare dhe intensiteti i ngjarjeve duket sikur na ka mësuar me të keqen, duke deligjitimuar çdo kauzë. Lajmi kësaj radhe duhet kërkuar te heshtja! “Gjumi” prej “shelegu” i ambasadorëve për këtë çështje është vërtet lajm që meriton vëmendje!”, shkruan Gjekmarkaj.
Ai thekson se një ditë hashashi mund t’i rrezojë të gjithë, edhe politikën që përfiton prej tij, duke zënë nën vete Shqipërinë.
“Ai ka politikat e veta “kulturore”! Mbase një ditë fantazistët në sqepat e shqiponjës së Flamurit mund të ënderrojnë dy degëza nga ai soj! Të nderuar Ambasadorë, nëse nuk ju duket hall, shprehuni për të si kuriozitet!”, thekson Gjekmarkaj.
