Aktualitet

Gërdeci, Gjykata Kushtetuese rrëzon kërkesën e Fatmir Mediut



Bëhu pjesë e Grupit Zyrtar të Opinion.al
>> KËTU <<
               Publikuar në : 12:25 - 27/07/22 |
Opi Nion

Kolegji i Gjykatës Kushtetuese ka vendosur të mos kalojë për shqyrtim çështjen e Gërdecit për Fatmir Mediun. Mediu i ishte drejtuar Kushtetueses me kërkesë shfuqizimin e vendimit të Gjykatës së lartë.

 “Kolegji çmon se kërkuesi nuk ka shteruar mjetet ligjore efektive në dispozicion, për rrjedhojë kërkesa nuk mund të kalojë për shqyrtim në seancë plenare”, thuhet ndër të tjera në vendimin e Kolegjit Kushtetues.

Gjykata e Posaçme e Apelit për Korrupsionin dhe Krimin e Organizuar  me vendimin nr. 205, datë 24.09.2021, vendosi revokimin e vendimit të pushimit të hetimeve dhe kthimin e akteve Prokurorit të Posaçëm për të proceduar, pasi imuniteti parlamentar në kohën e procesit të ngritur ndaj Mediut përbënte thjesht një pengesë të përkohshme procedurale për procesin penal, i cili duke qëndruar i pushuar përpara Kolegjit të Gjykatës së Lartë, me rënien e kushtit rifillonte ndjekja penale.

Kundër këtij vendimi Mediu paraqiti rekurs në Gjykatën e Lartë.

Por, Kolegji Penal i Gjykatës së Lartë, vendosi  mospranimin e rekursit te Mediut, duke arsyetuar se të gjitha pretendimet e ngritura në rekurs nga kërkuesi nuk janë të atilla që të cenojnë vendimmarrjen e asaj gjykate, pasi nuk ka mosrespektim ose zbatim të gabuar të ligjit material ose procedural me rëndësi për njësimin ose zhvillimin praktikës gjyqësore apo me pasojë pavlefshmërinë e vendimit, pavlefshmërinë absolute të akteve ose papërdorshmërinë e provave në dëm të shtetasit që ka paraqitur rekurs, si dhe nuk rezulton që vendimi i ankimuar është në kundërshtim me praktikën e Kolegjit Penal ose të Kolegjeve të Bashkuara të Gjykatës së Lartë.

Në datën 09.05.2022, Mediu i është drejtuar Gjykatës Kushtetuese, për kundërshtimin e vendimit të Gjykatës së Lartë.

Por Kolegji i Gjykatës Kushtetuese nuk pranoi kërkesën e Mediut.

Mediu po procedohet për veprat penale: “Shpërdorim i detyrës”, kryer në bashkëpunim, si dhe “shpërdorim i detyrës në bashkëpunim me subjekt ushtarak, kuadër komandues”.

Kujtojmë se shpërthimi në fabrikën e demontimit të armëve në Gërdec, shkaktoi vdekjen e 26 personave, plagosjen e rëndë të 27 të tjerëve, plagosjen e lehtë të 109 të të tjerëve. /Opinion.al

Pas