Qeveria miratoi në mbledhjen e djeshme garancinë e dytë sovrane, në favor të bankave tregtare që do të mundësojë huadhënien për tregtarët dhe shoqëritë tregtare për të siguruar fondet e nevojshme për kapital qarkullues dhe investime për të mbështetur rimëkëmbjen e aktivitetit tregtar që është ndikuar nga situata e krijuar nga COVID-19.
Ministrja e Ekonomisë dhe Financave, Anila Denaj, njofton nëpërmjet një statusi në Facebook, se garancia e dytë 15 miliardë lekë. Qeveria garanton 60% të principalit të çdo huaje dhe sipërmarrjet kanë kohë deri në 5 vjet për të shlyer kredinë. Sipas marrëveshjes për garancinë e dytë, sipërmarrjet kanë hapësirë deri në 6 muaj për të mos paguar principalin.
Statusi i ministres Anila Denaj
15 miliardë lekë mbështetje nga Qeveria Shqiptare për Garancinë Sovrane 2
Garancia Sovrane II, ofron mundësi financimi për të gjitha sipërmarrjet e ndikuara në aktivitet nga situata e pandemisë dhe me një historik pozitiv të marrëdhënies kreditore. Qeveria garanton 60% të principalit të çdo huaje, që bankat do të lëvrojnë për biznesin, sipas eksperiencave më të mira ndërkombëtare. Ky instrument:
Është në dispozicion për sipërmarrësit në të gjithë sektorët e ekonomisë
Synon të jetë burim për kreditimin e kompanive për kapital qarkullues dhe investime
Ofron mundësi financimi me një afat shlyerjeje deri 5 vjet
Ofron hapësirën për të mos paguar principalin për një periudhë jo më pak se 6 muaj
Ftojmë të gjitha bizneset, të mobilizojnë fondet e nevojshme për kapërcimin e efekteve të pandemisë dhe për të hedhur hapat drejt rimëkëmbjes së aktivitetit dhe ekonomisë.
Prej javës së ardhme bizneset mund të shprehin interesin pranë të gjitha bankave të nivelit të dytë. /Opinion.al
