Akademiku Artan Fuga ka komentuar në një intervistë televizive mbledhjen e Akademisë së Shkencave dhe vendimin e saj për të dërguar edhe njëherë te presidenti për rishikim kandidaturën e Skënder Gjinushit.
Për Fugën mbledhja ishte e paligjshme. Ai konstatoi një sërë problematikash duke filluar që nga mos prania e mediave, procedura e kthimit të ligjit tek presidenti dhe karakteri i jashtëzakonshëm i mbledhjes.
Ai tha se frika ndaj transparencës nëpërmjet medias tregon se organizatorët kanë dashur të fshehin diçka. Brenda akademikëve ka patur zëra kundër vendimit kryesisë sipas Fugës.
“Ai që do që gjëja të fshihet, të mbulohet, mos të dalë në opinionin publik, është ai që ka shqetësime. Pyetja ime është se si një akademi të mos pranojë transparencën e punimeve të veta. Aty ishin 2 akademikë nga 44, unë për arsye etike nuk bëj zëdhënësin por me aq sa di unë, unë nuk isha i vetëm në një pozicion që shkonte kundër asaj që kryesia dhe këshilli ekzekutiv donte, që të kthehej edhe njëherë tek presidenti që këtë kandidat shikojeni prapë. Nuk mund t’i kërkojmë presidentit rishikim sepse është pozicion juridik i panjohur. Pozicioni im, jemi në një mbledhje të paligjshme, po kërkojmë një gjë të paligjshme. Për mua presidenti është një pozicion”, tha Fuga.
Fakti se kjo mbledhje u deklarua si e jashtëzakonshme për Fugën nuk ka kuptim pasi kjo gjë nuk ekziston për Akademinë.
“Mbledhje të jashtëzakonshme nuk ka, terma ushtarakë në shkencë nuk ka. Për të intimiduar opinionin publik që të reagojë menjëherë në këtë amulli. Ne nuk jemi shoqëri jodemokratike por shoqëri kaotike. Unë pyes ç’është kjo mbledhje e jashtëzakonshme. Mbledhje të jashtëzakonshme e thërret këshilli ekzekutiv që nuk ka të drejtë të thërrasë mbledhje. E dyta hajde të kërkojmë që presidenti të rishikojë një vendim. Kur unë them 1 akademik përtej fushës së studimeve është anëtar i një turme, si çdo turmë. Këtë i thashë dhe këtu qëndroj. Diskutimet nuk është se ishin të gjallë. Kishte dhe nja dy diskutime të tjera dhe më pas u votua për një gjë që nuk janë kompetentë”, u shpreh Fuga.
Ndër të tjera Fuga foli dhe për reformën në drejtësi. Ai theksoi se ajo duhet të jetë e pavarur nga politika por kjo gjë sipas tij nuk mund të garantohet nga aktorët politik vendas. Sa i përket ndërkombëtarëve ai shtoi se ata nuk mund ta kuptojnë situatën në vend dhe se nuk mund të dalin dot nga kornizat institucionale.
“Kam një shqetësim, duhet që drejtësia duhet të jetë e pavarur nga politika. Nëse nuk është e pavarur nga politika, atëherë edhe njerëzit e rinj do të bien pre e drejtësisë si këta sot. Unë mendoj se politika shqiptare nuk është në gjendje të krijojë drejtësi të pavarur. Nëse partnerët e huaj vënë dorë dhe krijojnë këtë gjë jashtë sistemit, këtu besoj. Që politika vetë është e ndërgjegjshme, këtë nuk mund ta besoj. Unë mendoj se ndërkombëtarët e kanë shumë të vështirë që të pranojnë një politikë që del jashtë sistemit. E kam thënë edhe kur PS i futi deputetët e vet në çadra, në rrugë dhe në bulevard. Ndërkombëtarët duke jetuar në një sistem institucional, ku politika bëhet brenda institucioneve. E kanë vështirë, sepse nëse pranojnë, gjithë sistemi global mund të bëhet i tillë. Siç kishin ardhur punët në Shqipëri, opozita ishte kthyer në fasadë. Kështu, ajo nuk mund të kryente asnjë ol kritik a alternativë. Qëndrimi opozitar ka anët e veta avantazhuese dhe disavantazhuese.
Ne jemi sistem në krizë, ku 85 përqind e elektoratit ka dalë jashtë sistemit. Sistem që Unë jam i bindur se edhe brenda dhe jashtë vendit, ndërkombëtarët duhet ta kuptojnë se nuk funksionon kështu. Unë di që ky sistem me 85 përqind të votuesve që nuk votojnë për autoritetet e përfaqësimit lokal nuk mund të funksionojë” tha akademiku Fuga. /Opinion.al
