Franca po përgatitet për një valë të jashtëzakonshme të nxehti, ku këtë javë temperaturat do të arrijnë në 40 gradë celsius.
Këto temperatura do të thyejnë rekordin për muajin Qershor. Temperaturat priten të arrijnë 35 gradë ose më shumë të hënën dhe më pas të ngjiten edhe më shumë në ditët në vijim ku piku do të arrijë të enjten dhe të premten.
Më i prekuri nga kjo valë nxehtësie do të jetë veriu i vendit duke përfshirë edhe Parisin. Shatërvanë provizorë janë vendosur në vende të ndryshme dhe pishinat publike do të qëndrojnë të hapura deri vonë si pasojë e një plani për të përballuar të nxehtin ekstrem.
Sa më shumë ujë pritet të shpërndahet për njerëzit dhe një plan kujdesi do të vihet në fuqi për njerëzit e pambrojtur duke përfshirë edhe të moshuarit, pasi lagështia e lartë do të bëjë që 40 gradët të ndihen si 47 gradë në kryeqytet.
Franca, Gjermania, Zvicra dhe Belgjika do të përballen me temperatura rekord në ditët në vijim, por Franca është veçanërisht e vetëdijshme për rreziqet që vijnë nga moti i nxehtë.
Një situatë e tillë në Francë është shfaqur në gusht të vitit 2003, ku gati 15.000 persona humbën jetën dhe për këtë arsye kanë nisur të bëhen edhe krahasimet me situatën që do të përballet këto ditë.
Gjatë një muaji në atë vit u arritën tre temperaturat më të larta të regjistruara ndonjëherë, duke arritur në 44.1 gradë celsius më 12 gusht.
Sipas sinoptikanëve francezë temperaturat e larta të këtyre ditëve nuk do të bien deri në fund të javës.
Qyteti i Parisit ka aktivizuar nivelin e tretë të planit për temperatura ekstreme, ndërkohë që maksimumi arrin deri në nivelin e katërt, i cili nuk është përdorur asnjëherë./Opinion.al/
