Projekti “Veliera” në qytetin e Durrësit, ka nxjerrë mbi sipërfaqe një trashëgimi të gjallë arkeologjike, ku vlen të theksohet muri antik, që i përket periudhës bizantine.
Sipas studiuesve, muri antik, është dëmtuar si pasojë e punimeve për të realizuar projektin e iniciuar nga Bashkia Durrës.
Nga foto e publikuar në Opinion.al, tregohet se si kjo pasuri arkeologjike dhe kulturore, trajtohet në një mënyrë të tillë nga institucionet shqiptare të trashëgimisë kulturore dhe historike.
Siç vihet re nga pamjet, trajtimi i një vepre të tillë monumentale dhe historike, është një lojë tragji-komike me identitetin tonë kulturor dhe historik.
Mes këtij ansambli arkeologjik nga punimet, mbi sipërfaqe, kanë dalë edhe themelet e një prej godinave të administratës osmane në vitet 1800-1900.
Sipas arkeologëve, këto zbulime, përbëjnë një vlerë të shtuar në trashëgiminë tonë kulturore dhe si të tilla, mbulimi i tyre është një alternativë që nuk duhet të konsiderohet.
Ata kanë bërë me dije se për nga pasuritë arkeologjike që nëntoka e Durrësit zotëron, kjo zonë mund të gjenerojë të tjera zbulime.
