Xhanluka Lapadula është ftuar në kombëtaren italiane nga trajneri Xhampiero Ventura. Sulmuesi i Milanit, i cili shënoi në fundjavë golin e parë në Serinë A ndaj Palermos, u thirr për të zëvendësuar Manolo Gabiadinin, i cili kishte probleme muskulore. Futbollisti i Napolit u largua nga grumbullimi në Koverçiano dhe për…
Xhanluka Lapadula është ftuar në kombëtaren italiane nga trajneri Xhampiero Ventura. Sulmuesi i Milanit, i cili shënoi në fundjavë golin e parë në Serinë A ndaj Palermos, u thirr për të zëvendësuar Manolo Gabiadinin, i cili kishte probleme muskulore. Futbollisti i Napolit u largua nga grumbullimi në Koverçiano dhe për të zënë vendin e lënë bosh, Ventura grumbulloi debutuesin e katërt të listës për ndeshjet ndaj Lihtenshtejnit e Gjermanisë.
Kësisoj, për lojtarin e Milanit plotësohen 24 orë ëndrrash, gjatë të cilave ai kaloi nga një futbollist i lënë në harresë, në një protagonist të mirëfilltë. Për ish-lojtarin e Peskarës, kanë mjaftuar vetëm 154 minuta në total në Serinë A për të siguruar ftesën e parë në kombëtaren italiane.
Zakonisht, në radhët e të kaltërve dominon në numër grupi i futbollistëve të Juventusit. Por dëmtimet e njëpasnjëshme të lojtarëve bardhezi si dhe grumbullimi i Lapadulës, ka bërë që tashmë të jetë Milani klubi që ka më shumë përfaqësues te Italia. Bashkë me sulmuesin shkon në 6 numri i lojtarëve të thirrur nga Ventura, i cili ka në listë edhe Donaruman, De Shiljon, Romanjolin, Bonaventurën dhe Antonelin.
