Në emisionin “Opinion”, gazetarja Bleona Metushi foli lidhur me lajmet që kanë qarkulluar ditët e fundit se zëvendëskryeministrja Belinda Balluku ka marrë një fletëthirrje për t’u paraqitur në Prokurorinë e Posaçme kundër Korrupsionit dhe Krimit të Organizuar.
Metushi theksoi se ende nuk ka një njoftim zyrtar nga SPAK, por burime të besueshme brenda institucionit thonë se ministrja Balluku vërtet ka marrë një fletëthirrje dhe do të paraqitet të premten.
“Prokuroria e Posaçme as nuk e ka mohuar, as nuk e ka pohuar t’i ketë dërguar një fletëthirrje zv.kryeministres Belinda Balluku… Burime të ndryshme nga kjo prokurori e kanë konfirmuar se Balluku nesër pritet të paraqitet në bazë të një fletëthirrjeje të lëshuar më herët nga kjo prokurori, që është bërë publike jo zyrtarisht që në fillim të kësaj jave. Ka një fletëthirrje drejt Ballukut, nuk dihet orari.”, tha Metushi.
Ndërsa sa i përket arsyeve pse mund të jetë thirrur zëvendëskryeministrja, gazetarja shtoi se “Të njëjtat burime thonë se fletëthirrja lidhet me një procedurë tenderimi të vitit 2021, të lidhur me ish-kreun e ARRSH-së Ervis Berberi, por për çfarë akuzash nuk e dimë, do duhet të presim një informacion zyrtar.”
