Eksperti i çështjeve të drejtësisë Arben Braçe ka folur për çështjen e ekstradimit të Nezar Seitit, duke deklaruar se nuk ka ndodhur kurrë që një person nën hetim në Shqipëri të ekstradohet jashtë vendit. Dhe duket se Braçe e njeh mirë çështjen sepse për 19 vite ka drejtuar Departamentin e Ekstradimeve në Ministrinë e Drejtësisë, që njihet ndryshe si Drejtoria e Marrëdhënieve Gjyqësore me Jashtë.
Gjatë karrierës së tij nuk rezulton që të ketë një rast të dytë si precedenti Nezar Seiti, që t’i jetë dorëzuar një shteti tjetër duke qenë ndërkohë nën hetim në vendin e tij.
Për të gjithë ata që hetoheshin në Shqipëri, është aplikuar dorëzimi i shtyrë dhe asnjëherë nuk është miratuar ekstradimi qoftë nga gjykata, qoftë nga Ministria e Drejtësisë.
“Nuk ka patur qoftë dhe një rast ku një shtetas të dorëzohet pa vuajtur më parë veprën penale për të cilën akuzohet në Shqipëri. Ka patur persona nën hetim për të cilët është ndjekur dorëzimi i shtyrë, pra është bërë pezullimi i ekstradimit duke marrë në konsideratë që personi po hetoj në Shqipëri”, thotë Braçe, për Top Channel.
Në kohën që prokurorja e Përgjithshme ka urdhëruar nisjen e hetimeve, pyetja është se kush e ka shkelur ligjin? Braçe thotë se shkelja është lehtësisht e verifikueshme dhe gjithçka nis pikërisht në organin qendror të akuzës.
“Institucioni që ngarkon Kushtetuta është Prokuroria e Përgjithshme, që duhet të verifikonte gjithë ngarkesat penale që ka ky shtetas përpara se të ekstradohej, Këto ngarkesa penale i paraqiteshin gjykatës dhe Ministria e Drejtësisë e fillon dhe e mbaron procedurën e ekstradimit. Në të gjitha hallkat e këtij procesi duhet të kishte në konsideratë respektimin e marrëveshjes dypalëshe. Pra, duke i dhënë prioritet çështjes që ky shtetas ka në Republikën e Shqipërisë. Në rastin tonë, autoritet qendror është dhe Ministria e Drejtësisë, e cila duhet të jetë shumë më e kujdesshme, sidomos për çështje si ky shtetas që janë çështje të krimit të organizuar. Është një shkelje lehtësisht e verifikueshme”, thotë eksperti.
Përpara se Gjykata e Tiranës të vendoste pro ekstradimit, prokurori i kryeqytetit duhet të zbatonte gjithashtu ligjin.
“Organi i Prokurorisë që përpilon dosjen dhe që e çon dosjen në gjykatë për ekstradim shikon të gjitha ngarkesat penale që ka ky shtetas dhe ngarkesat penale që ka ky shtetas kanë qenë shumë evidente, pra, prokuroria përkatese që ka ndjekur dosjen përkatëse dhe Drejtoria e Marrëdhënieve Juridiksionale”, vijon Arben Braçe.
Ish-zyrtari Braçe e përshkruan ekstradimin e Seitit si mungesë e autoritetit të shtetit dhe sipas tij, shpërndarja e përgjegjësisë edhe ndaj Krimeve të Rënda është e pavend.
“Krimet e Rënda kanë dhënë një masë sigurie për këtë çështje. Ata nuk janë marrë me ekstradimin, është marrë një prokurori tjetër”, thotë ai. Tashmë që asgjë nuk zhbëhet, Arben Braçe paralajmëron se në bazë të parimit të specialitetit, hetimet ndaj tij në Shqipëri pushohen. “Prova ikën nga shteti shqiptar dhe shkon tek një shtet tjetër. Pra, ne e kishim një burim shumë të rëndësishëm të provës, i kishim të gjitha mundësitë për dorëzimin e shtyrë”, deklaron Arben Braçe.
/Top Channel
