Delegacioni qeveritar me në krye Kryeministrin Edi Rama është nisur sot për një vizitë zyrtare në Bruksel ku priten të zhvillohen disa takime të rëndësishme.
Në axhendën e kësaj vizite është parashikuar edhe një takim në orën 19:00 me Presidentin e Komisionit Europian Zhan Klod Junker dhe më pas të dy të dalin në një konferencë shtypi.
Ndërkaq në Parlamentin Europian, në kuadër të një eventit “Shqipëria dhe perspektiva e saj europiane”, kanë folur edhe raportuesi për Shqipërinë Knut Fleckenstein dhe eurodeputetja Monika Makovei. Fleckenstein tha se është i informuar për ngjarjet e fundit që kanë ndodhur në Shqipëri dhe ka bërë thirrje që ato të merren seriozisht, duke ju referuar këtu kërkesave të Presidentit Meta.
“Kam lexuar që Presidenti është i shqetësuar për situatën dhe se ajo mund të dalë jashtë kontrollit. Ne duhet ta marrim këtë seriozisht edhe pse ne nuk na takon që të ndërhyjmë në politikën e brendshme të Shqipërisë” ka deklaruar Fleckenstein.
Eurodeputeti foli gjithashtu edhe për procesin e negociatave. Ai përgëzoi Shqipërinë për progresin e bërë dhe gjithashtu i bëri thirrje shteteve anëtare të hapin negociatat e anëtarësimit me Shqipërinë. Por ai vuri gjithashtu në pah se disa shtete anëtare të BE nuk ndajnë të njejtin qëndrim me Parlamentin dhe Komisionin Europian lidhur me këtë çështje. /Opinion.al
