Monika Kryemadhi ka komentuar sot deklaratat që Presidenti Meta bëri javën e shkuar lidhur me propozimin e tij për të dalë nga kriza. Ajo tha se kjo gjuhë e Metë e ka befasuar dhe se mesazhi pas saj është se nuk ka kthim pas.
“Nuk e prisja në aspektin e artikulimit në atë lloj gjuhe, që mua më pëlqen, por që të flasë Ilir Meta me atë gjuhë për aq sa e njoh unë do të thotë se i ke rënë në qafë më shumë seç duhet. Artikulimi me atë gjuhë me atë ritëm dhe me atë intonacion do të thotë që ke bërë diçka shumë të madhe gabim, apo kur të ka dhënë të gjitha mundësitë dhe nuk e ke shfrytëzuar, s’ka kthim pas. Është fjalimi i një Ilir Mete, që ka gjithë argumentet për të të shkartërruar. E di shumë mirë çdo të thotë kur është Ilir Meta në vështirësi” tha Kryemadhi.
Lidhur me deklaratën e presidentit se ai ka popullin me vete, kryetarja e LSI, tha se presidenti ka të drejtën me vete në këtë rast dhe se kush ka të drejtën ka dhe popullin.
“Ajo që Iliri thotë në këtë pozicion është që nuk është çështja që ka popullin me vete, ka të drejtën e kush ka të drejtën ka edhe popullin.”
Kryemadhi komentoi edhe nismën e PS për shkarkimin e presidentit. Për të kjo do të nënkuptojnë rënien e të gjitha pushteteve në dorë të një njeriu. Ndërsa dorëheqja e Metës nga ana tjetër do ti jepte Ramës argument për të thënë se Meta iku vetë.
“Çdo dorëheqje e Metës do i jepte argument Ramës të thotë iku vetë. Sa për shkarkimin më vjen keq ta them, por Rama do bëhej si Berisha në 1997 që i mori të gjitha pushtetet. Shkarkimi i Ilir Metës për mua do të faktonte përfundimisht, rënien e të gjithë institucioneve në dorë të një njeriu, që do mbahet mend në shek.. XXI me një psikopat të droguar. Rënia e institucioneve të presidentit do të thotë të destabilizosh Rajonin e Ballkanin. Destabilizon vendin më pro europian në rajon” u shpreh Kryemadhi. /Opinion.al
