Është firmosur marrëveshja e bashkëpunimit mes Qeverisë Shqiptare dhe Fondacionit Shqiptaro-Amerikan për Zhvillim (AADF), për krijimin e 100 laboratorëve të parë SMART në shkollat 9-vjeçare dhe për programin e ri të kodimit në arsimin parauniversitar.
I pranishëm në nënshkrimin, kryeministri Edi Rama tha se pas 100 laboratorëve të parë, projekti do të shtrihet më pas edhe në shkolla të tjera.
“E fillojmë me 100 laboratorët e parë smart në 100 shkolla të vendit tonë. Ky është vetëm fillimi, ne do vazhdojmë më tutje sepse ambicia jonë është që me shpejtësi të shkojmë drejt plotësimit të të gjitha shkollave me laboratorë smart, po sigurisht kjo kërkon financë dhe një njohje të mirë të procesit. Me këto 100 shkolla të para do kemi disa muaj kohë për të parë. Ne besoj nesër do lancojmë përsëri me Fondin Shqiptaro Amerikan një tjetër program që është programi i kodimit, i të mësuarit të kodimit për nxënësit, të rejat dhe të rinjtë që janë në arsimin parauniversitar”,-tha Rama.
