Vendimi i Autoritetit të Mediave Audiovizive (AMAs) për mbylljen e transmetimeve analoge në Qarkun Tiranë dhe Durrës, është një akt anti-kushtetues sipas Partisë Demokratike.
Në një deklaratë për mediat, ish-deputetja Albana Vokshi tha se nga ky vendim “preket e drejta kushtetuese e mbi 300 mijë shqiptarë të varfër të cilët nuk kanë asnjë mundësi të blejnë një dekoder”.
“Sondazhi i vetë AMA-s tregoi se 16% e popullsisë në qytet nuk kanë dekoder. Të dhënat për fshatin qëllimshëm mungojnë, por për të gjithë është e qartë se numri i familjeve që privohen nga e drejta kushtetuese për informim për shkak të pamundësisë për të blerë dekoder, është shumë më i lartë. Shifrat zyrtare tregojnë se në qarqet Tirane, Durrës dhe Vlore, 70.430 familje nuk janë pajisur me dekodera” tha Vokshi.
Ajo shtoi se fikja e sinjaleve analoge cënon të drejtën kushtetuese për informim dhe i bëri thirrje AMA-s të pezullojë vendimin “derisa të gjitha familjet shqiptare të jenë pajisur me dekodera falas”.
Në deklaratën për media Vokshi parashtroi katër kërkesa për transparencë për qeverinë lidhur me tenderimin e procesit, familjet përfituese të dekoderave falas dhe strategjinë e implementimit.
“Partia Demokratike përsërit kërkesën qeverisë të bëjë transparencë urgjente për:
Cila është ecuria e tenderave për blerjen e dekoderave për familjet në nevojë?
Ku kanë shkuar 2.5 milionë euro për 2 tendera që duhet të pajisnin 80 mijë familje me dekodera?
Cilat janë familjet që janë pajisur me dekodera?
Pse Grupi ndërinstitucional për implementimin e strategjisë dhe ndjekjen e gjithë procesit deri në kalimin e plotë në transmetimet numerike l nuk funksionon prej më shumë se dy vjetësh?Liria e shprehjes dhe e drejta për informim janë prerogativë në rrugën e Shqipërisë për në BE” tha në fund të deklaratës së saj Albana Vokshi. /Opinion.al
