Gazetari Blendi Fevziu, i ftuar në një emision televiziv, foli për përplasjet e brendshme në Partinë Demokratike pas vendimit të kreut të PD-së, Lulzim Basha për të pezulluar ish-kryeministrin, Sali Berisha.
Gjatë fjalës së tij, gazetari Blendi Fevziu tha se në krye të PD-së, nuk duhet as Basha dhe as Berishën, por theksoi se Partia Demokratike ka nevojë për një kryetar të ri, i cili nuk duhet të jetë më shumë se 35-vjeç.
“Berisha ka dy pika të dobëta në aksionin e tij politik. E para është që Berisha duhet ta kishte kontestuar humbjen e Bashës më 26-27 Prill, dhe jo në shtator.
Pika e dobët e Berishës është se nuk e kontestoi humbjen e zgjedhjeve të 25 Prillit menjëherë pas zgjedhjeve dhe jo kur u përjashtua nga partia.
Po marr rastin e zgjedhjeve në Kosovë, ku dy konkurrentë të rinj konfirmohen me rezultat shumë të mirë në zgjedhjet lokale. Unë mendoj se PD ka nevojë për një drejtues që të mos jetë më shumë se 35-vjeç. Do të ishte mirë që Basha dhe Berisha të largoheshin nga PD. Partia Demokratike është krijuar në 90-ën dhe ata persona që u përfshin ishin 20 vjeç, ata e kanë bërë ciklin e tyre politik sot pas 30-vjetësh. Unë mendoj se duhet një kryetar i ri, jo më shumë se 35-vjeç, pasi një 50-vjeçar e ka të vështirë t’i tërheqë të rinjtë”, tha Fevziu.
