Katër makina janë djegur nga zjarri pas mesnatës të së premtes në zonën e Unazës së Re, në Tiranë. Shkak i ngjarjes, sipas policisë, ka qenë një histori fejese e prishur.
Dy prej makinave të cilave iu vu zjarri ishin në pronësi të Amelina Ahmetit, 32 vjeçe, nga Elbasani, pedagoge në Universitetin Bujqësor të Kamzës.
Dy automjetet e tjera që u dogjën nuk kanë pasur lidhje me ngjarjen, por kanë marrë flakë pasi ishin parkuar pranë makinave që iu vu zjarri qëllimisht.
Policia e Tiranës informoi dje në mëngjes në lidhje me ngjarjen, duke thënë se krimi ka ndodhur në rrugën “Enver Birko”, në vendin ku ishin parkuar automjetet në Unazën e Re pranë një hoteli privat.
Autori i dyshuar i ngjarjes, sipas policisë, është Oltjan Murataj, 29 vjeç, banues në Tiranë, i shpallur në kërkim me urdhër kërkimi nga Komisariati nr.5.
Ai dyshohet të ketë shtyrë persona të tjerë për të kryer shkatërrimin e mjeteve me zjarr, pasi ka pasur konflikte të vazhdueshme me shtetasen Amelina Ahmeti.
Policia ka thënë se i dyshuari për ngjarjen, shtetasi Oltjan Murataj, është shpallur në kërkim, pasi nuk ka qenë e mundur të arrestohej.
Bëhet me dije se policia ka kryer kontrolle në disa banesa dhe ambiente ku mendohej se mund të ishte 29 vjeçari, por ai nuk është gjetur.
SHERRI PËR FEJESËN
Policia njoftoi dje se automjetet e markave “Nissan” dhe “Opel”, në pronësi të shtetases Amelina Ahmeti, 32 vjeçe, janë djegur plotësisht. Si pasojë e rënies së zjarrit, janë dëmtuar pjesërisht makinat tip “Mercedes Benz” dhe “Skoda”, të parkuara pranë makinave që kanë qenë objektiv i zjarrvënies. Oltjan Murataj, 29 vjeç, banues në Tiranë, sipas policisë, ka pasur konflikt me pedagogen e Kamzës.
Ai ka qenë i fejuari i motrës së Amelina Ahmetit, të cilën e fajësonte se kishte ndikuar në prishjen e fejesës. Sipas hetimeve të policisë dyshohet se objektivi i 29vjeçarit ka qenë shkatërrimi i automjeteve të kunatës dhe bashkëshortit të saj.
Hetuesit kanë thënë se shtetasi Oltjan Murataj pretendonte prej muajsh se Amelina Ahmeti kishte ndikuar te motra e saj që të prishte fejesën me 29-vjeçarin. Ky i fundit, sipas policisë, pasi ka tentuar disa herë të vendoste normalitetin e të komunikonte me ishtë fejuarën dhe motrën e saj, dyshohet se ka kaluar në veprime të dhunshme e hakmarrëse/ Panorama.al
