Europa përkujton sot çlirimin nga Gjermania naziste në kushte të pazakonta, teksa pjesa më e madhe e kontinentit përballet me izolim për shkak të koronavirusit.
75-vjetori i fundit të Luftës së Dytë Botërore do të shënohet me ceremoni ku do të marrin pjesë krerë shtetesh, por grumbullimet e mëdha të njerëzve nuk do të lejohen.
Dy minuta heshtje do të mbahen në Britaninë e Madhe, të ndjekura nga një fjalim i mbretëreshës. Ceremoni me dyer të mbyllura do të zhvillohen edhe në Francë dhe Gjermani në prani të Emmanuel Macron dhe Angela Merkel.
Më 8 maj të vitit 1945, Britania dhe forcat aleate pranuan zyrtarisht dorëzimin pa kushte të Gjermanisë naziste, pas gati 6 vitesh luftë.
Ceremoni të ngjashme përkujtimore për atë që njihet si Dita e Fitores, zhvillohen më 9 maj në ish-vendet e Bashkimit Sovjetik përfshirë Rusinë, Ukrainën dhe Bjellorusinë./Opinion.al
