Skëndërbeu i Korçës ishte një ekip që thuajse ishte i eleminuar nga grupi në Europa Ligë. Ndeshja e mbrëmshme përballë Lokomotivës së Moskës, ishte për korçarët më shumë një ndeshje nderi se sa kërkim i një rezultati pozitiv për të shkuar më tej.
Por nuk mund të quhej më prestigj ndërsa shikon momentet e fundit të ndeshjes kur për 3 minuta pësohen dy gola. Është normale që në një lojë futbolli të pësosh gol.
Madje të pësosh edhe dy. Madje edhe në minutat e fundit. Madje edhe për një ekip si Skëndërbeu, të pamësuar me evente madhore futbollistike. Por nuk duket fare normale kur shikon se si lojtarët kundërshtarë i shënojnë golat si të kishin përballë birila: mbrojtjen e një ekipi që edhe në Gjibraltarin e vogël me 30 mijë banorë, nuk do ta toleronin një përgjumje të tillë.
E rastësishme apo jo, gjithsecili mund ta gjykojë vetë. Por kjo nuk është hera e parë, në kupat e Europës, që Skëndërbeu pëson gola të tillë në minutat e fundit. Kujtojmë këtu ndeshjen me irlandezët e Crusaders, ku çuditërisht nga rezultati 2-1 për korçarët, në 2 minutat e fundit irlandezët kthejnë rezultatin në 3-2. A thua të jenë vetëm rastësi, të cilat bashkohen në një emër: Skënderbeu? Dritan Laci
