Eurodeputeti David Lega ka kritikuar qeverinë shqiptare se ushtron presion ndaj mediave ndërsa nga ana tjetër tregohet e butë në luftën e kultivimit të drogës në vend.
“Udhëheqja shqiptare ka tendencë të jetë e ashpër me gazetarët dhe e butë për trafikantët e drogës, ndërsa padyshim që duhet të jetë anasjelltas,” deklaroi raportuesi i Partisë Popullore Evropiane për Shqipërinë në Parlamentin Evropian, duke folur në seancën e së hënës në Komitetin e Çështjeve të Jashtme të Parlamentit Evropian për Shqipërinë.
Lega vuri në dukje se kanabisi shqiptar “vazhdon të jetë problem për Evropën” dhe pritet të rritet. Ai kujtoi se lufta kundër kultivimit të drogës është një nga kushtet që Shqipëria të ulet në bisedimet e pranimit me BE.
Lega ishte po aq i ashpër me insistimin e qeverisë shqiptare për të miratuar ndryshimet në ligjin e medias të cilat u cilësuan si “të pazbatueshme” nga Komisioni i Venecias.
“Paketa e propozuar kundër shpifjes është një turp, është anti-kushtetuese, e paligjshme dhe shkel qartë parimet themelore demokratike të sundimit të ligjit dhe të drejtat e njeriut,” deklaroi ai.
Eurodeputeti paralajmëroi se miratimi i saj do të rrezikojë pranimin e Shqipërisë në BE.
Lega i kërkoi qeverisë të bëjë gjithçka për të mbrojtur lirinë e shtypit të Shqipërisë dhe të punojë akoma më shumë për të shkatërruar rrjetet e krimit të organizuar në vend./ Opinion.al
