Kursi i këmbimit të Euros me Lekun po shfaq një luahtshmëri pothuajse të paprecedentë.
Sipas kursit zyrtar të këmbimit të Bankës së Shqipërisë, Euro u këmbye të enjten me 104.7 lekë, në rritje me 2.75 pikë krahasuar me ditën e mërkurën.
Pasi pati rënë me afërsisht tre pikë ditën e hënë, kursi ka lëvizur në kah të kundërt në harkun pothuajse në të njëjtën, brenda tre ditëve. Sipas ekspertëve, lëvizjet me intervale të tilla në kahe të kundërt janë tregues se ecuria e kursit nuk është normale dhe tregu duket nën ndikimin e faktorëve psikologjikë ose spekulativë.
Sipas burimeve nga tregu, rritja e fortë e kursit që nisi qysh pasditen e të mërkurës mund të jetë e lidhur me sinjalet e dhëna nga Banka e Shqipërisë. Guvernatori Sejko tha dje se rënia e fortë e kursit gjatë muajit korrik mund të mos jetë reflektim i kushteve fondamentale të tregut, duke paralajmëruar një ndërhyrje të bankës qendrore.
Sipas Guvernatorit, kjo ndërhyrje mund të bëhet duke rritur shumat e blerjes në ankandet e planifikuara qysh më parë nga Banka e Shqipërisë, në funksion të menaxhimit të rezervës valutore.
Burime bëjnë të ditur se bankat janë njoftuar se shumat e blera në ankandin e nesërm priten të jenë ndjeshëm më të mëdha se vlerat e parashikuara më parë. Të gjitha këto sinjale mund të kenë sjellë një rritje të kërkesës së bankave në tregun valutor dhe rritjen e shpejtë të kursit.
Megjithëse konfirmoi angazhimin ndaj regjimit të lirë të kursit të këmbimit, Guvernatori Sejko la të kuptohej dje se Banka e Shqipërisë nuk do të lejojë një mbiçmim të mëtejshëm të monedhës vendase, të paktën në afatin e shkurtër. Në këtë kuptim, ndoshta qëllimi është që Euro të mos lejohet të bjerë poshtë kuotës së 100 lekëve.
Në deklaratën e djeshme, këshilli Mbikëqyrës u shpreh se forcimi i Lekut ka luajtur një rol të rëndësishëm në mbrojten e ekonomisë shqiptare nga vala inflacioniste dhe, mes të tjerash, ka lejuar mbajtjen e normave më të ulëta të interesit krahasuar me ekonomitë e tjera të Europës. Por, nga ana tjetër, forcimi i mëtejshëm i Lekut mund të dëmtojë rëndë sektorët eksportues të ekonomisë, duke përfshirë turizmin dhe të dëmtojë konkurrueshmërinë e ekonomisë shqiptare.
Megjithatë, mekanizmi që Banka e Shqipërisë ka zgjedhur për ta bërë këtë është i diskutueshëm. Ankandet e blerjes së valutës janë një instrument që përdoret për menaxhimin e rezervës valutore dhe si rregull nuk kanë qëllim të ndikojnë kursin e këmbimit. Përdorimi i tyre duket si një artificë për të shmangur ndërhyrjen e drejtpërdrejtë në treg, gjë që Banka e Shqipërisë mund ta bëjë vetëm për të korrigjuar çrregullimet afatshkurtra të kursit të këmbimit.
Sipas Guvernatorit Sejko, Banka e Shqipërisë ka tërhequr nga tregu 170 milionë euro deri tani gjatë këtij viti, kryesisht nëpërmjet ankandeve të programuara për nevojat e rezervës valutore, por edhe nëpërmjet një ndërhyrjeje të drejtpërdrejtë më datë 20 korrik./Monitor
