Reagimet e zyrtarëve të Shteteve të Bashkuara të Amerikës në lidhje me krizën politike në Shqipëri dhe zgjedhjet e 30 qershorit kanë patur jehonë të gjerë në mediat ndërkombëtare.
Platforma mediatike “eureporter” i ka kushtuar sot një artikull zgjedhjeve vendore të 30 qershorit në Shqipëri me titullin “SHBA kërkon që zgjedhjet e ardhshme në Shqipëri të zhvillohen paqësisht”.
Aty përmenden takimet dhe deklaratat e dy diplomatëve amerikanë Daniel Koski dhe Philip T. Reeker të cilët këmbëngulin në zhvillimin në paqe të procesit zgjedhor dhe njohjen si të ligjshëm të këtij të fundit pavarësisht veprimeve të Presidentit dhe pretendimeve të opozitës.
Artikulli fokusohet në deklaratën e fortë sipas të cilës në Shqipëri zgjedhjet e 30 qershorit duhet të zhvillohen paqësisht, përndryshe opozita e vendit do të klasifikohet si “organizatë e dhunshme”. Ky paralajmërim i zyrtarëve të SHBA konsiderohet disi ‘i pazakonte’ dhe se ai vjen vetëm pak ditë para zgjedhjeve vendore.
Në shkrim thuhet qartë se për SHBA zgjedhjet duhet të zhvillohen në 30 qershor dhe kushdo që do të ndërhyjë për të ndërprerë procesin zgjedhor do të klasifikohet si organizatë e dhunshme. Aty citohet një eurodiplomat sipas të cilit kjo masë është tepër e rëndë pasi mjafton të kujtojmë se është një shkallë më poshtë se klasifikimi si organizatë terroriste.
Në artikull përmenden dhe pasojat që vijnë nga aplikimi i kësaj mase. “Ky klasifikim do të prekte drejtuesit dhe anëtarët e organizatës, të cilëve mund t’i sekuestrohen pasuritë e t’u bllokohen llogaritë bankare. Një tjetër masë do të ishte ndalimi për të udhëtuar dhe ndikimi i drejtpërdrejtë mbi pozicionet publike apo bizneset e tyre” shkruhet nga “eureporter”.
Sa i përket opozitës, shkrimi citon ambasadën Amerikane në Tiranë e cila përkrah të drejtën për të protestuar por nga ana tjetër dënon veprimet e dhunshme. “Synimi i shpallur i opozitës është forcimi i demokracisë në vend, por veprimet e dhunshme gjatë protestave shkojnë kundër këtij qëllimi”. /Opinion.al
