Pas përplasjeve në seancën e fundit, Sekretariati i Etikës ka përjashtuar me 20 ditë Flamur Nokën dhe me 10 ditë Elda Hotin nga punimet e Kuvendit.
Noka qëlloi me shishe drejt kreut të grupit parlamentar të PS, Taulant Ballës, duke i thënë se “do ta rripte si kec.” Elda Hoti i mori kartën e deputetit Bora Muzhaqit për t’i ndërprerë fjalën teksa opozita kishte bllokuar foltoren.
Ndërsa për Ballën dhe Albana Vokshin, e cila pati një përplasje verbale me Bora Muzhaqin, nuk janë ndërmarrë masa.
Vetëm një ditë pas përplasjes e kaosit, PS kërkoi përjashtimin e Nokës me 60 ditë nga Kuvendi dhe me 30 ditë për Vokshin e Hotin. PD u kundërpërgjigj duke kërkuar përjashtimin e Ballës me 60 ditë nga punimet e Kuvendit.
Përplasja ndodhi kur kryetari i Kuvendit, Niko Peleshi, kërkoi 5 minuta pushim dhe transmetimi i seancës ishte ndërprerë. Noka e qëlloi Ballën me shishe duke e kërcënuar haptazi.
“O legen, do të të rrjep si kec. Je ai që kërcënon dhe shantazhon deputetet e opozitës. Të bëj atë që as nuk të shkon në mendje”, i tha Noka.
Kurse Vokshi i tha Muzhaqit se nëse do kishte pak integritet nuk do e kishte marrë fjalën në Kuvend pasi Niko Peleshi ia hoqi të drejtën Elda Hotit. Deputetja e PD shtoi se Muzhaqi nuk e kupton realitetin për shkak të memeve.
“Si do të ndiheshit ju, si do të ndiheshe ti Vokshi sikur vajzës tënde t’i thonin këtë që më the ti mua. Si do të vinte?”, ia ktheu Muzhaqi, duke nxitur një reagim të ashpër nga deputetja e PD.
“Mos i përmend fëmijët e mi, mbylle gojën, fëmijët e mi mos i përmend kurrë. Fëmijët e mi në këtë grup të qelbur mos i përmendë, turp të të vijë, turp të të vijë!”, i tha ajo.
Debati nisi kur kreu i grupit të PS, Taulant Balla, kërkoi 1 minutë heshtje për masakrën e 2 prillit që sipas opozitës ishte provokim.
