I urren përrallat, se për një artist të jetosh është më fantastike, sesa të imagjinosh brenda një guacke. Është kantautor, dhe për të nuk ka muzikë për njerëz të ndryshëm, por muzikë për gjendje të ndryshme shpirtërore. Deri para kualifikimit në Sanremo 2016 me “Odio le favole” (I urrej përrallat), Ermal Meta, 34 vjeç (në prill mbush 35), nuk njihej në Shqipëri, edhe pse në Itali është miku i ngushtë i Laura Pauzinit dhe ka shkruar këngë për të famshëm si Marko Mengoni, Emma Marrone, Chiara, Annalisa, Patty Pravo etj.
Kënga e tij u rendit në vendin e parë në platformën “Timmusic”, dedikuar muzikës dixhitale, duke u konsideruar për momentin më e kërkuara në seksionin e këngëtarëve të rinj, “Sanremo Giovanni”.
I lindur në Fier, Meta, një nga autorët më të vlerësuar në muzikën bashkëkohore italiane si autor i shumë këngëve të suksesshme, rrëfen botën e një artisti të panjohur për shqiptarët, por që ka ditur si të hyjë në zemrat e italianëve…
“Fillova duke kënduar në disa grupe në qytetin e Barit në Puglia. Me një në veçanti, grupin “La Fame di Camilla”, publikuam tri albume nëpërmjet etiketës diskografike “Universal”. Njëkohësisht kompozoja këngë për këngëtar të famshëm në Itali”, thotë artisti në një intervistë për Panorama.
