Presidenti i Turqisë, Recep Tayyip Erdogan, ka konfirmuar sërish se vendi i tij do të blejë sistemin mbrojtës raketor nga Rusia.
Pavarësisht paralajmërimeve të përsëritura nga Shtetet e Bashkuara të Amerikës, Erdogan tha se furnizimet me sistemin S-400 do të nisin në muajin korrik. Presidenti turk tha se Ankaraja e ka shqyrtuar më herët edhe blerjen e sistemit raketor amerikan Patriot, por se oferta e SHBA-së “nuk ka qenë e favorshme si ajo e Rusisë”.
Kujtojmë se zëvendëspresidenti i SHBA, Mike Pence, gjatë fjalimit të tij të mbajtur në kuadër të 70-vjetorit të themelimit të NATO-s, paralajmëroi se Turqia rrezikon anëtarësinë e saj në NATO nëse blen sistemin rus, që për Uashingtonin është një kërcënim për avionët amerikanë.
Ai ka paralajmëruar se në rast se kjo marrëveshje nuk anulohet, Turqisë do t’i duhet të zgjedh mes NATO-s dhe sistemit rus të mbrojtjes nga raketat S-400.
“Turqia duhet të zgjedhë. Dëshiron të mbetet një partner i besueshëm i aleancës më të fuqishme ushtarake në historinë e botës? Apo dëshiron të rrezikojë sigurinë e partneritetit duke ndërmarrë vendime të pamatura që minojnë aleancën tonë?”/ Opinion.al
