Presidenti turk, Rexhep Tajip Erdogan, ka deklaruar se komuniteti ndërkombëtar po dështon përballë sulmeve të kundërligjshme dhe pa dallim të Izraelit ndaj civilëve në Gaza.
Në mesazhin e tij për 78-vjetorin e Kombeve të Bashkuara (OKB), presidenti Erdogan tha se njerëzimi po përballet me një sërë problemesh, përfshirë konfliktet në Palestinë dhe Ukrainë, ndryshimet klimatike, urinë, varfërinë dhe islamofobinë.
“Që nga 7 tetori, ne kemi qenë dëshmitarë të masakrave në Gaza që shënjestrojnë vendbanimet civile, vendet e kultit, spitalet dhe shkollat, si dhe kanë arritur nivelin e gjenocidit. Fatkeqësisht, komuniteti ndërkombëtar po dështon përballë sulmeve të kundërligjshme dhe pa dallim të Izraelit ndaj civilëve”, tha Erdogan.
Presidenti turk tha se Këshilli i Sigurimit i OKB-së po e thellon krizën me një “qasje të njëanshme” në vend që t’i ndalojë vrasjet, të krijojë një armëpushim dhe të parandalojë vdekjet e civilëve.
“Një organizatë që është një vëzhgues i dënimit kolektiv të njerëzve në Gaza nuk mund t’i ofrojë shpresë njerëzimit dhe të sigurojë paqen dhe stabilitetin”, tha ai.
İnstitucionet e OKB-së, përfshirë agjencinë e OKB-së për refugjatët palestinezë (UNRWA), po bëhen jo-funksionale nga Këshilli i Sigurimit të OKB-së, shkruan Anadolu.
Megjithatë, shtoi ai, Turqia vazhdon të mbështesë dhe të mbrojë fuqishëm “vlerat e OKB-së për parimin e multilateralizmit, të cilat në thelb janë të sistemit global të bazuar në rregulla”.
Konflikti në Gaza, i cili ka qenë nën bombardimet izraelite dhe një bllokadë që nga 7 tetori, filloi kur grupi palestinez Hamas filloi operacionin “Tufani i Aksasë”, një sulm i befasishëm i shumëanshëm që përfshinte një breshëri lëshimesh të raketave dhe depërtimesh në Izrael përmes tokës, detit dhe ajrit.
Ushtria izraelite më pas nisi një sulm të pamëshirshëm ajror kundër objektivave të Hamasit në Rripin e Gazës. Më shumë se 7.100 njerëz janë vrarë në konfliktin që filloi më 7 tetor, përfshirë të paktën 5.791 palestinezë dhe 1.400 izraelitë.
2.3 milionë banorët e Gazës kanë mbetur pa ushqim, ujë, ilaçe dhe karburant, si dhe autokolonat e ndihmave të lejuara në Gaza kanë bartur vetëm një pjesë të asaj që nevojitet./Opinion.al
