Ekzekutimi i 57-vjeçarit, Pjetër Kaza, në Tale të Lezhës, dyshohet se e ka motivin me hakmarrjen. Kaza, i cili u ekzekutua mëngjesin e sotëm në oborrin e shtëpisë së tij, është viktima e tretë në familjen e tij shënuar gjatë viteve të fundit. Kjo sepse dhe dy vëllezërit e tij janë vrarë si pasojë e gjakmarrjes, raporton gazetari Martin Marku, si rezultat i gjakmarrjes.
Saga e gjakmarrjes ka nisur që prej vitit 1997, kur në familjen Kaza u vra një prej vëllezërve të 59-vjeçarit. Viktima i ’97-ës ka qenë dhe shefi i krimeve të Rreshenit. Vëllai tjetër i Pjetër Kazës, arriti të hakmerrej ndaj familjes Gjini, që ekzekutoi shefin e krimeve në ’97-ën, duke vijuar kështu me hakmarrjet. Vetëm një vit më parë, u vra në Belgjikë Agustin Kaza, vëllai i viktimës së sotme, për të shënuar vijimësinë e gjakmarrjes mes dy familjeve.
Teksa pista kryesore e hetimeve qëndron tek hakmarrja, është arritur identifikimi i një autori të mundshëm të ngjarjes, raporton gazetari Martin Marku.
“Policia në fakt, sipas informacioneve më të fundit, ka arritur që të vijë në një farë mënyre në gjurmët e autorit të kësaj ngjarje dhe është vënë në ndjekje që prej orëve të para të mëngjesit”, raporton gazetari.
Bëhet me dije se viktima ka qenë i vëzhguar nga autori/autorët e ngjarjes, teksa Pjetër Kaza u ekzekutua me armë zjarri teksa po hynte në banesën e tij me automjetin e tij.
Viktima u gjet nga bashkëshortja e tij i pajetë brenda në automjet. Autoritetet sakaq, po punojnë për për zbardhjen e plotë të ngjarjes.
“Në fshatin Tale, Lezhë, në rrethana ende të paqarta, është vrarë me armë zjarri shtetasi P. K., rreth 57 vjeç, banues në Tale. Nga veprimet e para hetimore dyshohet se ngjarja ka ndodhur para banesës së tij, në kohën që shtetasi P. K., po kthehej për në banesë me automjetin e tij. Menjëherë pas marrjes së njoftimit, në vendngjarje janë nisur shërbimet e Policisë vendore të mbështetura nga Forca Kombëtare e Sigurisë, Njësia Shkodër. Ndërkohë është ngritur një grup i posaçëm hetimor i cili ka shkuar në vendin e ngjarjes, dhe nën drejtimin e Prokurorit, po kryejnë veprimet hetimore me qëllim zbardhjen e ngjarjes, identifikimin dhe kapjen e autorit”, njofton Policia.
