Prokuroria e Posaçme kundër Krimit të Organizuar dhe Korrupsionit (SPAK) ka mbyllur hetimet dhe ka dërguar për gjykim në GJKKO dosjen për Erion Alibej, i akuzuar si pjesëmarrës në grup të strukturuar kriminal dhe për dy vrasje, atë të Emiljano Ramazanit dhe Regis Runajt.
Alibej akuzohet për vrasje me paramendim të Emiljano Ramazanit më 20 korrik të vitit 2020 në lagjen “28 nëntori” në Elbasan. Po ashtu Alibej akuzohet edhe për vrasjen e Regis Runajt më 29 korrik 2020 në lagjen “Emin Matraxhi”.
Ndërkohë, në njoftimin e SPAK thuhet se ndaj personave nën hetim Albert Manahasa dhe Seit Manahasa është kërkuar pushimi i çështjes për shkak se nuk e kanë kryer veprën penale për të cilën janë dyshuar.
Më parë SPAK ka çuar për gjykim Euglen Halilajn dhe Xhuljano Hoxhën me akuzën për “Vrasja me paramendim”, “Grup i strukturuar kriminal” dhe “Pjesëmarrje në grup të strukturuar kriminal”.
Kujtojmë se Regis Runajt u gjet i masakruar me thikë pranë varrezave të Elbasanit, mbrëmjen e 29 korrikut 2020.
Regis Runaj dhe Emiljano Ramazani ishin miq të ngushtë me njëri-tjetrin ndërsa u vranë njëri-pas tjetrit brenda 9 ditësh në Elbasan.
