Edhe pse ishte shpallur në kërkim për një sërë veprash penale si vrasje, plagosje, grabitje dhe atentate, Talo Çela lëvizte lirshëm në qendër të Tiranës.
Kështu rezulton në një e-mail dërguar ish-drejtorit të Policisë së Shtetit, Gledis Nano, të publikuar së fundmi nga hakerat të cilët kanë hyrë në inbox-in e tij.
Sipas Top-Channel, grupi i hakerave ka bërë publike të dhëna sekrete të policisë që shkëmben Ministria e Brendshme me ambasada të rëndësishme në vendin tonë.
Sipas këtij e- maili Çela është parë teksa lëviz dy herë në Tiranë, në korrik dhe në gusht të këtij viti.
Burimi i Nanos tregon se më 5 Gusht 2021 pas orës 20.00, ai ka shkuar në një hotel me adresë tek Rruga e Dibres, ku shoqërohej nga tre persona të tjerë që e ndiqnin me makinë, ndërsa vetë ishte në një automjet tjetër tip “AudiQ8”.
Çela thuhet se ndodhej së bashku me një grua dhe një fëmijë herën e parë kur është parë, ndërsa ndërsa herën e dytë është parë vetëm.
E-maili i plotë:
Drejtoria e Antiterrorit ka administruar një informacion i cili bën fjalë për personin në kërkim Talo Çela dhe disa lidhje me interes të tijë.
Sipas informacionit, personi në kërkim Talo Çela prej disa kohësh është parë të lëvizë në Tiranë. Me datën 5 Gusht 2021 pas orës 20.00 ai ka shkuar tek një hotel me adresë tek Rruga e Dibres. Atje ai ka shkuar i shoqëruar nga tre persona të tjerë të cilët kishin në përdorim nje mjet tip golf ngjyrë gri kurse vetë udhëton me një mjet tip Audio Q8 ngjyrë blu të errët me targa gjermane. Burimi ka informuar se në këtë objekt, Talo Çela ka qënë dhe para dy javësh, rreth datave 25-26 Korrik 2021. Herën e parë, Talo është parë në makinë me një femër dhe një femijë kurse me datën 5 ka qënë vetëm. Sipas informacionit, Talo ÇELA ka marrë kontakt me shtetasin Ervin Mata. Sipas burimit, Ervinit i kanë thënë se me këtë duhet pasur kujdes se ka shumë kundërshtarë dhe se mund ta vrasin. Ervini i është përgjigjur që le të bëjnë çfarë të duan, për mua ka rëndësi që të mos më ndodhë ngjarje tek objekti im. Burimi i informacionit dyshon se Ervin Mata mund ta përdorë Talon për të eleminuar ndonjë nga kundërshtarët e tijë.
Ju bëjmë me dije se nga ana jonë është këmbëngulur se sa të sigurtë e ka burimi këtë informacion dhe ai ka ngulur këmbë se është tepër e sigurtë për këto takime dhe personi që e ka vënë në dijeni është lidhje e afërt e Ervin Matës dhe ngul këmbë që të ruhet pasi është një ndër përsonat e pakët që ka dijeni për takimet e Talos me Ervin Matën.
Kush është Talo Çela
Çela është një prej personave më të kërkuar në Shqipëri. Për kapjen e tij, Policia e Shtetit ofron 10 mijë euro shpërblim për këdo që ka informacion.
49-vjeçari nga Elbasani është person i shpallur në kërkim kombëtar dhe ndërkombëtar, pasi Gjykata për Krimet e Renda Tiranë i ka caktuar masën e sigurisë “Arrest në burg”, për veprat penale “Vrasja e punonjësit të policisë” kryer në bashkëpunim, mbetur në tentativë, “Vjedhja me armë e kryer në bashkëpunim”, në kuadër të grupit të strukturuar kriminal dhe “Vrasja me paramendim, kryer në bashkëpunim”.
