Detaje të reja kanë dalë në dritë pas arrestimit të shtetasit turk Faruk Ozer, i cili ishte shpallur në kërkim ndërkombëtar për mashtrim.
Sipas Abc News, turku Faruk Ozer i cili fshihej në lagjen “5 Maji” në qytetin e Elbasanit ishte mbajtur nën përgjim për të paktën dy javë. Në këtë mënyrë iu zbuluan të gjitha lëvizjet që ai bënte së bashku me një grup prej 6 personash.
Me kërkesë të Prokurorisë së Elbasanit dhe me vendim të Gjykatës së këtij qarku nisën përgjimet për të kërkuarin ndërkombëtarisht, gjë e cila çoi dhe në zbulimin e vendodhjes së saktë të Faruk Ozer.
Pasi u zbulua vendodhja, u bë organizimi i operacionit për kapjen e tij.
Biznesmeni turk Faruk Ozer, u arrestua në një plazh të Himarës, ndërsa bashkë me të u vu në pranga edhe një shtetas tjetër me inicialet E.H, i cili dyshohet se ka ndihmuar në fshehjen e Ozer.
Faruk Fatih Ozer ishte pronari i kriptmonedhës turke “Thodex”, ndërsa u arratis nga Turqia duke mashtruar dhjetëra mijëra turq, të cilët kishin investuar paratë e tyre, rreth 2 miliardë dollar, në këtë monedhë virtual turke./Opinion.al
