Administratori i Njësisë Administrative Tomin, në Dibër, Nuri Meda pretendon se është dhunuar nga një eksponent i Partisë Demokratike. Sipas tij, e ka dhunuar Dritan Selishta, ku me doreza hekuri e ka qëlluar në pjesë të ndryshme të trupit dhe i ka kafshuar gishtin.
Sipas versionit të tij të ngjarjes, është njoftuar nga partia e tij (PDIU) se po shpërndaheshin para për blerje votash në fshatin Pilafe. Aty ka takuar Selishtën me të cilin fillimisht ka debatuar, por më pas janë konfrontuar fizikisht.
Partia Demokratike nga ana tjetër deklaron se dy presona, Nuri Meda dhe Robert Aga janë kapur duke shpërndarë para në popull për të blerë votat. PD thotë se Meda është ndaluar nga banorët dhe jo nga përfaqësues zyrtarë të demokratëve.
Po sipas PD-së, Nuri Meda është shkarkuar dy muaj më parë nga detyra e administratorit të Tominit, për korrupsion. Por një muaj me pas, i shkarkuari për korrupsion rikthehet në detyrë kësaj radhe si përfaqësues i PDIU.
“Meda nisi direkt punën e tij për të blerë vota, krim që e kishte kryer edhe ne zgjedhjet e vitit 2015. Ky person me precedent në vjedhje, rryshfet dhe blerje votash po tentonte të bënte të njejtën gjë derisa u ndalua nga qytetarët e Tominit”, thotë PD-ja.
“Meda është pjesë e bandës kryesore për dhunimin dhe blerjen e votës, denoncuar nga PD në prokurori një javë më parë si pjesë e grupit te strukturuar kriminal për blerje votash në Dibër. Hajdute dhe dhunues të votës së lirë si Meda janë njerezit dhe alternativa e Edi Ramës, që do të marrë përgjigjen e merituar të dielen me 11 shtator”, thuhet në deklaratën zyrtare të PD-së.
