Helikopteri EC 145 që u rrëzua sot në Malësinë e Madhe kishte pak muaj që ishte blerë nga Ministria e Mbrojtjes. Në tetor teksa bënte prezantimin ministrja Kodheli tha se me helikopterët e rinj modernizojmë FA dhe i përafrojmë me NATO-n. Sot helikopteri i ri i kompanisë franceze “Eurocopter” u rrëzua në rrethana ende të paqarta ku humbën jetën dy pilotë.
Ky nuk është aksidenti i vetëm ajror me mjetet ushtarake të porsablera nga qeveria shqiptare. Kujtojmë se tre vite më parë në Francë, një helikopter ushtarak i së njëjtës kompani “Eurocopter”, u rrëzua teksa bënte testin e fundit përpara se t’i dorëzohej autoriteteve shqiptare. Për pasojë, gjashtë anëtarët e ekuipazhit humbën jetën.
Në pak vite, dy helikopterë të rinj të së njëjtës kompani rrëzohen tragjikisht. Kjo shton pikëpyetje të mëdha nëse këto aksidente janë gabime njerëzore apo problem me mjetet e reja të ushtrisë shqiptare?
