Sipërmarrësja e njohur Diana Gjermeni është një nga gratë e forta të shoqërisë sonë e cila ka ngritur me shumë mund e djersë një biznes të njohur bukurie ku vajzat zgjedhin të kurojnë imazhin prej vitesh. Në “E ardhmja është vajzë” në ekranin e Klan Plus, ajo rrëfen se si jeta ndonjëherë nuk është aq rrëzëllitëse sa pamja që të serviret në pasqyrën e një salloni. Një ngjarje e fortë që ka shenjuar jetën e saj, është humbja e dy prindërve, brenda 40 ditëve.
Diana Gjermeni: E kam shumë të vështirë. Unë për pak ditë mbush gati një vit që kam humbur të dy prindërit.
Ermira Çausholli: Të dy prindërit.
Diana Gjermeni: Të dy prindërit. I kam humbur në një kohë shumë të shkurtër, brenda 40 ditëve.
Ermira Çausholli: Shkak ishte Covidi?
Diana Gjermeni: Nuk mendoj se ishte Covid-i, unë nuk e di se edhe mjekët nuk janë të sigurtë. Babai im humbi jetën brenda dy ditëve, shkoi shumë shpejt, kaloi një ishemi. Mami im kishte një shprehje të vetën, ata duheshin shumë, kishin gati 40 vjet martesë dhe ajo thoshte gjithmonë që: “As dhjetë ditë pas teje nuk dua të jetoj më” dhe realisht ashtu ndodhi. Në bazë të të thënave që dëgjojmë, njerëzit thonë që janë dashur shumë dhe kanë ikur bashkë me njëri-tjetrin./tvklan.al
