Duket se PS nuk e ka përtypur lehtë deklaratën e Monika Kryemadhit se fermerët duhet të heqin dorë nga hashashi dhe të mbjellin shafran. Kjo për faktin se deputetja e LSI la të kuptuar se kultivimi i bimës narkotike është masiv. Sot përgjigjen ia ka kthyer Taulant Balla deputet i PS-së. Gjatë një takimi që ka zhvilluar në Belsh, ai ka pohuar se nuk ka kohë për eksperimente dhe propozoi kultivimin e duhanit në vend të shafranit.
“Unë nuk mendoj që ne merremi me kundërpërgjigje. Kjo është më shumë se kaq. Në kuadër të programit tonë për bujqësinë mendojmë se duhani është një prej kulturave bujqësore më të rëndësishme që ka zona e Bleshit, Cerrikut, por edhe zona të tjera kanë. Kjo është një kulturë e sprovuar në këto anë. Ka mbi 50-60 vjet që në këto anë prodhohet duhan. Vetëm Belshi, në fund të viteve ’80 prodhonte deri në 3 mijë tonë duhan dhe kjo e përkthyer në vlerë financiare është një vlerë shumë e madhe. Kështu që më shumë se sa të bëjmë prova, jemi më të fokusuar drejt prodhimit të një produkti i cili ka dhënë garanci që në këtë zonë bëhet, që fermerët tanë kanë eksperiencën e duhur për trajtimin e tij. Jemi në drejtimin e duhur për kultivuar një prodhim bujqësor që ka rendiment shumë të lartë krahasuar me kultura të thera bujqësore”, – tha Balla.
Kryemadhi propozoi që qeveria të mbështesë qoftë edhe ekonomikisht, mbjelljen e bimës së shafranit. Sipas deputetes, nëse qeveria do subvenciononte shafranin do i largonte kështu njerëzit nga mbjellja e paligjshme e kanabisit. “I bëj thirrje gjithë qytetarëve që të shkojmë sa më shumë drejt kultivimit të bimëve që do të përmirësojnë dukshëm dhe jetesën e qytetarëve. Dhe jemi në zonën ku duhet të mbillet shafran. Përveçse luftojmë kundër kultivimit të kanabisit largojmë njerëzit nga mentaliteti në shërbim të kësaj bime të krimit të organizuar por kultivojmë ndërkohë produkte tejet elitare. Është një zonë kjo e Dumresë, Cërrikut, Peqinit e Gramshit që është shumë e mirë për kultivimin e shafranit. Ndihmon në biznese familjare por edhe në punësimin e madh të grave”, – tha pak ditë më parë Kryemadhi.
