Dy 18-vjeçarë, David Shehu dhe Mariglen Vata, janë arrestuar nga policia pas janë kapur me lëndë narkotike Cannabis Sativa. Mësohet se dy të rinjtë sillnin lëndën narkotike me postë, nga Mbretëria e Bashkuar në Shqipëri.
Sipas policisë, në vendin e quajtur “Rrethrrotulli”, Plepa, Durrës, shërbimet e Policisë kanë ushtruar kontroll në taksinë me të cilën udhëtonte drejt Tiranës, David Shehu dhe si rezultat i kontrollit, u gjetën dhe u sekuestruan në cilësinë e provës materiale, 2 pako kartoni, brenda të cilave ndodheshin 5 qese me lëndë narkotike Cannabis Sativa, me peshë totale rreth 340 gramë.
Nga veprimet hetimore ka rezultuar se pakot kanë ardhur me postë nga Mbretëria e Bashkuar në Shqipëri dhe se porositësi i tyre është Mariglen Vata, i cili ka dërguar Shehun për t’i marrë pakot nga vëndi i mbërritjes (Durrës) dhe për t’i sjellë në Tiranë.
Ndërkohë, vijon puna për dokumentimin e plotë ligjor të kësaj veprimtarie kriminale, si dhe për identifikimin dhe vënien para përgjegjësisë ligjore të personave të tjerë të implikuar në të.
