41- vjeçari Kokthi u arrestua pasditen e së enjtes me urdhër të Njësisë Task-Force të Prokurorisë së Tiranës, pasi rezulton se në kundërshtim me ligjin, ka lejuar kthimin e mallit të konfiskuar një subjekti tregtar privat, që ushtron veprimtarinë në shit-blerjen e pjesëve këmbimit të automjeteve.
Në mars 2015, Drejtoria e Hetimit Tatimor në Drejtorinë e Përgjithshme të Tatimeve, konstatoi se në subjektin ”Lubjana Baçi” gjendej një sasi malli pa faturë, me vlerë prej rreth 4 milionë lekë të reja.
Malli i konstatuar pa faturë është konfiskuar dhe është dërguar për ruajtje në magazinat e Rezervave të Shtetit.
Sipas Prokurorisë disa kohs pas konfiskimit të mallit, nëpërmjet një shkrese, Drejtori Rajonal i Tatimeve Tiranë Androkli Kokthi urdhëron lirimin nga konfiskimi të mallit dhe kthimin e tij subjektit.
Por, prokuroria arsyeton se ky veprim është tërësisht në kundërshtim me ligjin, pasi malli i konfiskuar nuk mund të rikthehet, por vetëm mund të blihet nga subjektit, të cilit i është gjetur pa faturë. Po ashtu, në bazë të procedurave administrative dhe atyre tatimore, një urdhër administrativ i nxjerrë nga një organ më i lartë, nuk mund të shfuqizohet nga një organ më i ulët.
