Partia Demokratike i ka dërguar një kërkesë zyrtare gjyqtares Elona Toro, e cila është relatore e çështjes të ankimimit të bërë nga Enkelejd Alibeaj kundër vendimit të gjyqtarit Agron Zhukri në shkallën e parë, për njohjen e Kuvendit Kombëtar të PD më 11 dhjetor 2021, ku u shkarkua Lulzim Basha si kryetar dhe nisën procedurat që çuan në zgjedhjen e Sali Berishës në krye të demokratëve.
Në shkresën e dërguar që mban firmen e Enkelejd Alibeaj në cilësinë e nënkryetarit të partisë kërkohet përshpejtimi i seancës gjyqësore për shqyrtimin e ankimit pa marrë për bazë radhën e çështjeve të tjera të regjistruara kohë më parë duke e mbështetur këtë në nenin 460 të kodit të procedurës civile.
“Me pretendimin se ky vendim gjyqësor është dhënë në shkelje flagrante të ligjit, PD ka depozituar ankim kundër tij dhe më 22 prill 2022 ankimi është pranuar. Duke qenë të informuar mbi volumin e lartë të punës në Gjykatën e Apelit, ju drejtohemi me anë të kësaj kërkesë për të përshpejtuar caktimin e seancës gjyqësore të shqyrtimit të ankimit të paraqitur prej nesh, pa marrë për bazë radhën e çështjeve të tjera, të regjistruara në kohë më parë”, thuhet në letër.
Sipas Alibeaj mos shqyrtimi i kësaj çështje ka cenuar rëndë të drejtën kushtetuese të organizimit të partisë dhe të drejtën e çdo anëtari për t’u organizuar lirisht në parti politike.
“Të marra së bashku cenimi i këtyre lirive ka vënë në rrezik edhe rolin kushtetues të Partisë Demokratike, si forca opozitare që garanton pluralizmin dhe demokracinë përfaqësuese të cilat janë parime themelore të organizimit të Republikës së Shqipërisë”, thuhet në kërkesën e PD.
