Dosja e ish-kryeprokurorit Ardiatik Llalla do të kthehet edhe njëherë në Prokurorinë e Posaçme Kundër Korrupsionit për disa hetime shtesë.
Vendimi është marrë sot nga Gjykata e Posaçme kundër Krimit dhe Korrupsionit pas kërkesës së avokatit të ish-kryeprokurorit Llalla.
Konkretisht gjykata ka kërkuar të verifikohen transaksionet bankare për shitjen e disa pronave të paluajtshme dhe të merret dëshmia e një personi që i ka paguar Llallës 3 mijë euro për lindjen e fëmijës në Amerikë.
E gjithë kjo procedurë do të kryehet brenda 3 muajsh sipas Gjykatës e cila ka vendosur gjithashtu që seanca e radhës të zhvillohet në muajin nëntor 2020.
Hetimet për Llallën nisën në vitin 2019 me procedimin penal numër 65 të ndjekur nga prokurori Klodian Braho.
Më 9 Mars të këtij viti, Prokuroria e SPAK mori zyrtarisht të pandehur ish-kryeprokurorin Lalla me akuzat “Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, të kryer tre herë”. /Opinion.al
