Kriza politike në Itali përfundon me zgjedhje të parakohshme. Presidenti Sergio Mattarella pranoi dorëheqjen e dytë të kryeministrit Mario Draghi dhe menjëherë shpërndau Parlamentin.
Data e votimit të parakohshëm është caktuar 25 shtatori. Kreu i Shtetit njoftoi se qeveria e Draghit do të qëndrojë në detyrë deri pas zgjedhjeve, kur të vijë kabineti i radhës.
“Periudha që po kalojmë nuk lejon pauza në masat shumë të nevojshme që duhen për të luftuar efektet sociale dhe ekonomike të krizës dhe veçanërisht ndaj rritjes së inflacionit, e cila është shkaktuar kryesisht nga rritja e kostos së energjisë dhe ushqimit, duke shkaktuar pasoja të rënda për familjet dhe bizneset”, tha Mattarella.
Draghi largohet një vit e gjysmë pasi u emërua si kreu i pazgjedhur i një qeverie uniteti. Kjo pasi tre parti të koalicionit të tij qeverisës refuzuan ta mbështesin në votëbesimin e mbajtur në Senat gjatë së mërkurës. Kryeministri në largim falënderoi bashkëpunëtorët duke theksuar se ndihet krenar që u ka shërbyer qytetarëve të tij.
Ajo që zhyti në krizë koalicionin e tij politik ishte refuzimi i Lëvizjes 5 Stelle për të mbështetur paketën ekonomike. Partitë që pritet të përfitojnë më së shumti nga kriza përfshijnë Legën e Mateo Salvinit dhe Forza Italia të Silvio Berslucionit. Megjithatë, sondazhet kryesohen nga Fratelli d’Italia me lideren Giorga Meloni, që parashikohet të jetë kryeministrja e ardhshme e vendit.
