Ambasadori amerikan, Donald Lu deklaroi dje se Amerika ka kërkuar arrestimin e ‘peshqeve të mëdhenj’ të drogës dhe krimit. Ai përmendi emrin e Kryeprokurorit Adriatik Llalla për të cilin dha se i kam kërkuar prej 7 muajsh të nxjerr urdhër-arresti për Klement Balilin. Përmendi ministrin e Brendshëm, Tahiri, duke theksuar se operacioni me 200 polic për kapjen ishte dështim i madh. Përmendi edhe ministrin e Drejtësisë, Ylli Manjani duke thënë se është njohur me dosjen e Balilit në Greqi prej disa muajsh dhe i ka kërkuar edhe atij të nxisë arrestimin.
Ndër tre autoritetet e larta shtetërore të përmendura nga Donald Lu ka reaguar deri tani Ylli Manjani. Ai përsëriti se nuk është Ministria e Drejtësisë ajo që arreston njerëz. Gjithashtu Manjani kërkoi të mos bëhet ping-pong me përgjegjësinë për këtë çështje.
Më poshtë reagimi i plotë i ministrit të Drejtësisë, Ylli Manjani
Mbështes plotësisht shqetësimin e shprehur ditën e djeshme nga Ambasadori i Shteteve të Bashkuara të Amerikës, z. Donald Lu në lidhje me mosarrestimin e shtetasit Klement Balili. Gjej rastin t’ju informoj, se sikurse edhe mund të jeni në dijeni prej 7 muajsh dhe në mënyrë të përsëritur e kam shprehur dhe publikisht këtë shqetësim.
Mostrajtimi apo trajtimi i gabuar i kësaj çështje nuk mund t’i barazojë institucionet e shtetit në përgjegjësi dhe as të luhet “ping-pongu” i radhës.
Ligji shqiptar përcakton qartë se kush arreston, kush ndalon, kush akuzon dhe kush dënon persona të përfshirë në shkeljet e ligjit.
Ministri i Drejtësisë vetëm ndihmon me transmetim leter- porosish dhe/ose përkthim zyrtar të dosjeve. Këtë detyrë e kemi bërë në kohë rekord.
Kush ka kuriozitet mund të vijë pranë institucionit t’i verifikojë, sipas rregullave të informacionit të klasifikuar.
Ping-pongun e përgjegjësive e kam denoncuar gjithnjë si të keqen më të madhe që ka sot sistemi. Prandaj askush të mos fshihet pas alibive të sajuara, por të marrë përgjegjësitë që i jep ligji dhe t’i ushtrojë.
Përsëris qëndrimin tim të palëkundur se kushdo që ka shkelur ligjin duhet të ndëshkohet pa dallim!”
