Drejtuesi politik i PS në Qarkun e Vlorës, Damian Gjiknuri, ka thënë se aryseja se përse ai dhe kryeministri sulmohen është se opozita e do fitoren në xhep.
Në fjalën e parë publike pas përgjimeve të publikuara nga gazeta gjermane ‘Bild’, ish-ministri theksoi se Partia Socialiste nuk blen vota dhe nuk gënjen. Përgjimet e dala sipas tij kanë thjeshtë prapavijë politike.
“Ne as blejmë vota e as gënjejmë njerëz. Ata s’kanë përfaqësi fare në Vlorë, ata e mendojnë Vlorën në xhep pa qenë këtu. Pra, praktikisht këtë bëjnë në gjithë Shqipërinë dhe kjo është arsyeja pse goditem unë, pse goditet Edi Rama, pse goditen figurat kryesore të Partisë Socialiste”,tha Gjiknuri.
Gjatë takimit me banorët e Rajonit Nr.1 dhe të njësisë Novoselë ku prezantoi kandidatin për kryebashkiak Dritan Leli, Gjiknuri theksoi edhe se ata nuk do ta lejojnë opozitën të prishë zgjedhjet aq më tepër kur kjo vjen nëpërmjet dhunës.
Në përgjimet e gazetës gjermane ‘Bild’, Gjiknuri del duke sugjeruar nisjen e një furgoni me ‘tipa problematikë’ për vëzhgimin e votimeve në Dibër. Këto fjalë të ish-ministrit të Infrastrukturës dhe Energjisë, atëherë në detyrë, janë në dosjen 184 të Prokurorisë së Krimeve të Rënda. /Opinion.al
