Presidenti i Republikës, Ilir Meta ka bërë publik Kallëzimin Penal, që ka depozituar sot në SPAK dhe Prokurori, për Kuvendin lidhur me manipulimin e provave.
Në një dokument të gjatë të bërë publik për të gjithë, Meta akuzon Kuvendin e Shqipërisë falsifikim të dokumenteve dhe manipulim të provave para Gjykatës Kushtetuese.
Një nga shkeljet që Meta ka parashtruar është fakti se mbledhja e Kuvendit më 7 maj 2021 dhe rendi i ditës së kësaj seance janë përcaktuar 1 ditë para. Sipas Presidencës, kjo është një shkelje pasi rendi i ditës duhet të jetë bërë publike dy ditë më parë.
“Konkretisht mbledhja e Kuvendit në seancë plenare në 7 maj 2021 dhe përcaktimi i rendit të ditës së kësaj seance, u përcaktua me urdhrin nr. 19, datë 6.5.2021 të Kryetarit të Kuvendit, pra vetëm një ditë përpara zhvillimit të seancës. Ky veprim bie në kundërshti me Rregulloren e Kuvendit të Shqipërisë, e cila në nenin 27, pika 5, përcakton se:
“Në çdo rast, rendi i ditës duhet të jetë bërë publik të paktën 2 ditë përpara datës së caktuar për mbledhjen e komisionit, ose seancës plenare”.
Kjo prezumon rregullin se përcaktimi i rendit të ditës nuk mund të bëhet më vonë se 48 orë përpara zhvillimit të seancës së planifikuar. Në këtë mënyrë, përveçse sa më sipër, por dhe referuar fakteve se;
– Komisioni i Çështjeve Ligjore kishte përfunduar mbledhjen e tij vetëm në datën 6 maj 2021, kohë kjo e cila për nga përllogaritja e afateve kohore, përkonte me një afat me më pak se 20 orë deri në zhvillimin e seancës plenare në datë 7 maj 2021, ora 10:00;
– çështja objekt shqyrtimi paraqiste një rëndësi shumë të veçantë;
– kërkesat që Presidenti i Republikës kishte paraqitur në mënyrë të përsëritur për t’u dëgjuar në Komisionin e Ligjeve nuk ishin respektuar;
– Rregullorja e Kuvendit parashikonte se rendi dhe çështja objekt shqyrtimi nuk mund t’u bëhet me dije deputetëve më vonë se 48 orë përpara zhvillimit të seancës së planifikuar; bënin të detyrueshme që në rendin e ditës në seancën plenare të datës 7 maj 202, ora 10:00,
Kuvendi i Shqipërisë të mos përfshinte për shqyrtim në seancë plenare çështjen e shqyrtimit të Raportit të Komisionit të Çështjeve Ligjore dhe as ngritjen e Komisionit të Posaçëm Hetimor Parlamentar”-shkruhet në dokument.
Këtu gjeni Kallëzimin Penal./Opinion.al
