Partia Demokratike ka denoncuar sot se një ish-sigurims i komunizmit është bërë pjesë e Këshillit të Lartë të Prokurorisë. Bëhet fjalë për Bujar Sheshin. Deputeti demokrat, Gent Strazimiri deklaroi se “Vetingu ka mbajtur në sistemin e drejtësisë gjyqtarë dhe prokurorë në kundërshtim me ligjin, që i shërbejnë Edi Ramës për të mbajtur nën kontroll organet e reja të drejtësisë. Prova më flagrante është emërimi si anëtar i Këshillit të Lartë të Prokurorisë i prokurorit të Krimeve të Rënda Bujar Sheshi”.
Më tej ai tha se dokumentat zyrtare tregojnë se Sheshi është bashkëpunëtor i Sigurimit të Shtetit dhe për këtë fakt procedura e emërimit të tij duhet të ishte ndërprerë menjëherë. “Bujar Sheshi nuk duhet të ishte anëtar i Këshillit të Lartë të Prokurorisë, por Arta Marku e kualifikoi atë në kundërshtim me ligjin, në mënyrë që qeveria dhe ajo vetë, ta shantazhojnë për ta mbajtur nën kontroll”, theksoi ai.
Por më i çuditshëm është fakti se Autoriteti i Dosjeve ka publikuar me 3 muaj vonesë vendimin për Bujar Sheshin. Strazimiri ngre dyshime se po luhet një lojë e pisët nga Kryeministri Rama.
“Përse Autoriteti i Dosjeve e publikoi 3 muaj me vonesë gjetjen e papërshtatshmërisë absolute të Bujar Sheshit, si drejtues i asaj që quhet “drejtësia e re”? Ku “gaboi” shoku Bujar Sheshi, që Partia ta dënonte me dekonspirim?
Kjo është pyetja që kërkon përgjigje, për të sqaruar hijen e turpit që qëndron mbi konstituimin e organeve të “drejtësisë popullore e socialiste”, në të cilën e nën të cilën ligji zbatohet vetëm si dënim për mosbesnikëri ndaj partisë”, u shpreh deputeti demokrat. /Ri-De
*Me poshte dokumentet që tregojnë se Sheshi ka qenë Bashkepunetor i Sigurimit të Shtetit në sistemin diktatorial
