Ish-presidenti Bujar Nishani ka komentuar vendimin e presidentit Ilir Meta për të anuluar 30 qershorin si datë zgjedhjesh dhe për të dekretuar datën e 13 tetorit si datë të re për zhvillimin e zgjedhjeve lokale.
Nishani është shprehur gjatë një interviste televizive se Meta ka qenë i detyruar që të caktojë një datë të re zgjedhjesh.
Sipas ish-presidentit, nëse anulimi i zgjedhjeve më 30 qershor do të trajtohej politikisht, do të kishte një zbutje të krizës, por jo zgjidhje të saj.
“Nëse akti i Presidentit për anulimin e zgjedhjeve. do merrej parasysh dhe do trajtohej politikisht dhe institucionalisht, do të kishte një zbutje të situatë, jo zgjidhje por zbutje. Fakti që akti i Presidentit u zhbë, e ka agravuar edhe më tej situatën, e cila për fat të keq do jetë edhe më e vështirë në javët dhe muajt në vijim. Në Shqipëri gjatë shumë viteve janë krijuar precedentë të rrezikshëm në politikë. Presidenti Meta ka qenë i detyruar që të shpallë një datë dhe për këtë ka dhënë argumentet e tija. Për sa kohë anuloi datën e parë, duhet të shpallte një datë tjetër dhe nga pikëpamja juridike ai ka përmbushur një detyrim të tij ligjor”, tha ish-presidenti Nishani.
I pyetur nëse PD do të marrë pjesë në zgjedhjet e 13 tetorit, Nishani u shpreh se nuk bëhet fjalë për të konsumuar një datë zgjedhjesh, por qëllimi i opozitës është rritja e standardeve të zhvillimit të procesit të zgjedhjeve në Shqipëri.
“Ajo që kam kuptuar deri më tani, është akti shumë herë më i gjerë dhe përtej një date të caktuar. Këtu nuk bëhet fjalë për të konsumuar një datë, një akt formal elektoral. Opozita ka qëllim zhbërjen e një rrjeti të një kompleksiteti kulturash, sjelljesh, mekanizmash, abuziv, jo vetëm në kontekstin politik të pushtetit por edhe të përfshirë me aktivitetin e grupeve kriminale. Sot kemi një shtet në kolaps, kemi një sistem i cili edhe me 30 qershorin, konfirmoi se Shqipëria nuk i ka ikur mentalitetit dhe kulturës së monizmit. Një pjesë e politikës është e gatshme që ta pranojë monizmin si mekanizëm dhe kulturë dhe të punojë në interes të një pushtit të një segmenti politik, duke shkelur çdo kod ligjor, duke i inkriminuar në segmente të rëndësishme të politikës . nuk bëhet fjalë për të pasur një datë tjetër, për të qenë formale, por për të zgjidhur këtë ngërç institucional, social dhe ligjor që është në Shqipëri”, tha Nishani./ Opinion.al E.Xh.
