Pas paralajmërimit të mjekëve specializantë se do të bojkotonin punën nëse nuk iu plotësoheshin kushtet, ka reaguar QSUT.
Në reagimin e QSUT, thuhet se pas një takimi të zhvilluar me mjekë specializantë u arrit mirëkuptimi për disa pika të rëndësishme dhe se puna do të vazhdojë normalisht.
Njoftimi i QSUT:
Drejtoria e Qendrës Spitalore Universitare “Nënë Tereza” sqaron lidhur me lajmin e shpërndarë në media “mjekët specializantë në QSUT do të bojkotojnë shërbimin e rojeve” se ditën e sotme datë 27.06.2019 një grup specializantësh të shërbimit të Kirurgjisë zhvilluan një takim me drejtuesit e QSUT ku u bisedua lidhur me disa kërkesa të tyre për mbarëvajtjen e punës në shërbimin e tyre.
Gjatë takimit u sqaruan disa pika nga kërkesat e grupit të specializantëve si dhe u ra dakord që në ditët në vijim të bisedohet për zgjidhjen e pikave të tjera.
Ky komunikim mes drejtuesve të QSUT dhe një grupi mjekësh specializantë të shërbimit të Kirurgjisë nuk ndikon aspak procesin e punës në këtë shërbim si dhe nuk cënon shërbimin ndaj pacientëve që është në fokusin e punës tonë të përditshme./ Opinion.al E.Xh.
