Kreu i Grupit Parlamentar të Partisë Demokratike Gazment Bardhi ka njoftuar për mbledhjen e Grupit Parlamentar të PD dhe të Kryesisë gjatë javës së ardhshme.
Sipas Bardhit, kjo thirrje ka ardhur nisur nga kërkesa e disa kolegëve anëtarë të Kryesisë së Partisë Demokratike dhe të Grupit Parlamentar, me qëllim vlerësimin e situatës politike dhe hapave që duhet të ndërmarrë PD për ringritjen dhe forcimin.
Ai njofton se më datë 5 qershor do të diskutojë me Grupin Parlamemtar dhe më datë 6 qershor do të mbledhë Kryesinë e Partisë Demokratike.
“Nisur nga kërkesa e disa kolegëve anëtarë të Kryesisë së Partisë Demokratike dhe të Grupit Parlamentar, me qëllim vlerësimin e situatës politike dhe veçanërisht hapave që duhet të ndërmarrë Partia Demokratike e Shqipërisë për ringritjen dhe forcimin e saj, në përputhje me Statutin e Partisë kam vendosur:
– Thirrjen e mbledhjes së Grupit Parlamemtar të Partisë Demokratike, ditën e hënë, datë 05.06.2023, ora 12:00.
– Thirrjen e mbledhjes së Kryesisë së Partisë Demokratike, ditën e martë, datë 06.06.2023, ora 17:00.
Me Rend ditë të të dyja mbledhjeve: “Diskutimi mbi situatën politike ne vend, dhe mbi procesin e riorganizimit të PDSh.”.
Secili anëtar i Grupit Parlamentar dhe Kryesisë së Partisë, do të shfrytëzojë kohën në dispozicion për të elaboruar dhe propozuar zgjidhjet më të mira për forcimin dhe riorganizimin e partisë”, shkroi Bardhi./Opinion.al
